కారు, స్కూటీ ఢీ...ఇద్దరు స్పాట్ డెడ్

దిశ ప్రతినిధి, రాజన్న సిరిసిల్ల: స్కూటీ, కారు ఢీకొని ఇద్దరు అక్కడికక్కడే మృతి చెందిన ఘటన జిల్లా కేంద్రంలో చోటు చేసుకుంది. స్థానికులు తెలిపిన వివరాల ప్రకారం, జిల్లాలోని చందూర్తి మండలం తిమ్మాపూర్ గ్రామానికి చెందిన పిట్టల అంజయ్య-నీరజ ఇద్దరు కూతుళ్లు. ఇటీవల పెద్ద కుతూరుకు జ్వరం వచ్చి కొనరావుపేట మండలం నిమ్మపల్లి అమ్మ వాళ్ళ ఇంటికి నీరజ... ఇద్దరు కూతుళ్లతో వెళ్ళింది. ఇక గురువారం నీరజ వాళ్ళ అమ్మ వాళ్ళ ఇంటి నుంచి, ఇద్దరు కూతుళ్ళతో అత్తవారింటికి బయలుదేరింది.

ఈ క్రమంలో సిరిసిల్లలో తెలిసిన వ్యక్తి స్కూటీపై తన పెద్ద కూతురును ఎక్కించి, నీరజ ఆటోలో సిరిసిల్ల మొదటి బైపాస్ గుండా ప‌య‌నం అయ్యారు. ఈ క్రమంలో కే-కన్వెన్షన్ ఫంక్షన్ హాల్ వద్ద యూటర్న్ తీసుకుంటున్న స్కూటీని కారు ఢీ కొట్టింది. ఈ ఘటనలో పిట్టల సాన్వీత (9), మేస్త్రి పనిచేసుకునే ఆంధ్రప్రదేశ్ రాష్ట్రానికి చెందిన అజేరియా(37) అక్కడికక్కడే మృతి చెందారు. సంఘటన స్థలానికి చేరుకున్న పోలీసులు కేసు నమోదు చేసి, దర్యాప్తు చేస్తున్నారు. పోస్టుమార్టం నిమిత్తం మృతదేహాలను సిరిసిల్ల ఏరియా ఆసుపత్రికి తరలించారు.