175 మంది ఉద్యోగులను తిరిగి విధుల్లోకి తీసుకోవడం హర్షనీయం

దిశ, తెలంగాణ బ్యూరో : ఉద్యాన శాఖలో రైతులకు సహాయపడేందుకు నియమించిన ఉద్యాన విస్తరణాధికారులు 175 మందిని తిరిగి ప్రభుత్వం నియమించడం పట్ల విస్తరణాధికారులు సంఘం హర్షం వ్యక్తం చేసింది. గత ప్రభుత్వం 2020 మే 20న కరోనా కాలంలో బడ్జెట్ ​కారణం చూపుతూ ఆకారణంగా తమను విధుల నుంచి తొలగించిందని, కరోనా తర్వాత విధుల్లోకి తీసుకోవాలని మంత్రుల, ఎమ్మెల్యేలు చుట్టూ తిరిగి స్పందన లేదన్నారు. ఐదు సంవత్సరాల పాటు తాము ఆర్థిక ఇబ్బందులు ఎదుర్కొనామని ఆ సంఘం నాయకులు విశ్వనాథ రెడ్డి, సెక్రటరీ సంధ్యా జోషి తెలిపారు.

రేవంత్​రెడ్డి ఆధ్వర్యంలో ఏర్పడిన కాంగ్రెస్​ప్రభుత్వం తమకు ఎన్నికల్లో హామీ ఇచ్చి విధుల్లోకి తీసుకోవడం మరిచిపోలేమని పేర్కొన్నారు. ఆదివారం ప్రజా భవన్​లో ప్లానింగ్​ కమిషన్​ వైస్​చైర్మన్ ​చిన్నారెడ్డిని కలిసి కృతజ్ఞతలు తెలిపారు. 175 కుటుంబాలు ప్రభుత్వానికి రుణపడి ఉంటాయన్నారు. ఉద్యోగులమంతా ఎల్లవేళలా రైతు సేవాలో ఉద్యాన శాఖ, తెలంగాణ ప్రభుత్వం నిర్వహించే కార్యక్రమాల్లో రైతుల మధ్య బలమైన అనుసంధానంగా పనిచేస్తామని పేర్కొన్నారు. ఈ కార్యక్రమంలో బండి వేణు కుమార్, సైదులు, బాల ప్రకాష్, సాగరిక, దేవేందర్, వీరన్న తదితరులు పాల్గొన్నారు.