విషాదం.. మరో నీట్ విద్యార్థిని ఆత్మహత్య
దేశంలో 'నీట్' (NEET) పరీక్షల వివాదం సృష్టించిన ప్రకంపనలు ఇంకా చల్లారకముందే.. మరో ల్యాబ్ అసిస్టెంట్/నీట్ విద్యార్థిని బలవన్మరణానికి పాల్పడింది.
దిశ, వెబ్డెస్క్: దేశంలో 'నీట్' (NEET) పరీక్షల వివాదం సృష్టించిన ప్రకంపనలు ఇంకా చల్లారకముందే.. మరో ల్యాబ్ అసిస్టెంట్/నీట్ విద్యార్థిని బలవన్మరణానికి పాల్పడింది. మధ్యప్రదేశ్లోని ఇండోర్లో ఓ విద్యార్థిని అనుమానాస్పద స్థితిలో భవనంపై నుంచి దూకి ప్రాణాలు కోల్పోయింది. పోలీసుల కథనం ప్రకారం.. నీట్ పరీక్షకు ప్రిపేర్ అవుతున్న అవంతిక మౌర్య (21) అనే విద్యార్థిని గురువారం అర్ధరాత్రి తాను ఉంటున్న హాస్టల్/ నివాస భవనంలోని మూడో అంతస్తు నుంచి కిందకు దూకేసింది. తీవ్ర గాయాలపాలైన ఆమెను గమనించిన స్థానికులు వెంటనే ఆస్పత్రికి తరలించారు. అక్కడ అత్యవసర విభాగంలో చికిత్స పొందుతూ ఆమె శనివారం తెల్లవారుజామున కన్నుమూసింది. పరీక్షల ఒత్తిడి, పేపర్ లీక్ పరిణామాల నేపథ్యంలోనే ఆమె ఈ తీవ్ర నిర్ణయం తీసుకుందా అనే కోణంలో పోలీసులు దర్యాప్తు జరుపుతున్నారు.
ప్రభుత్వ తీరుపై తీవ్ర విమర్శలు..
నీట్ పేపర్ లీక్ వ్యవహారం బయటపడినప్పటి నుంచి దేశవ్యాప్తంగా ఇప్పటికే పదుల సంఖ్యలో విద్యార్థులు మానసిక ఒత్తిడి తట్టుకోలేక ప్రాణాలు కోల్పోవడంపై తీవ్ర విమర్శలు వ్యక్తమవుతున్నాయి. ఇంత పెద్ద కుంభకోణం, పేపర్ లీక్ దందా సాగినా.. ఇప్పటివరకు కేంద్ర ప్రభుత్వం నుంచి ఒక్క నాయకుడిని గానీ, కనీసం ఒక్క మంత్రిని గానీ బాధ్యులుగా నిర్ధారించకపోవడంపై విద్యార్థి సంఘాలు, ప్రతిపక్షాలు మండిపడుతున్నాయి. తప్పు చేసిన పెద్దలను వదిలేసి, అసలు సమస్యను పక్కదారి పట్టించేలా మోడీ సర్కార్ సరికొత్త డ్రామాలతో మళ్లీ 'రీ-ఎగ్జామ్స్' నిర్వహిస్తూ విద్యార్థుల జీవితాలతో ఆటలాడుకుంటోందని, ఈ మానసిక వేధింపుల వల్లే విద్యార్థులు తనువు చాలిస్తున్నారని బాధితుల కుటుంబ సభ్యులు, విద్యావేత్తలు ఆవేదన వ్యక్తం చేస్తున్నారు.
