ముషీరాబాద్‌లో ప్రధాని మోదీ రోడ్ షో
దిశ, ముషీరాబాద్: తెలంగాణ అసెంబ్లీ ఎన్నికల్లో భాగంగా హైదరాబాద్‌లో ప్రధాని మోదీ రోడ్ షో నిర్వహించారు. సోమవారం సాయంత్రం ఐదున్నర గంటలకు ఆర్టీసీ క్రాస్ రోడ్స్ నుంచి ప్రారంభమైన రోడ్ షో చిక్కడపల్లి, నారాయణగూడ, వైఎంసీఏ కాచిగూడ మీదుగా సాగింది. ముందుగా ఆర్టీసీ క్రాస్ రోడ్స్ కు వచ్చిన మోదీ అక్కడ ప్రజలకు అభివాదం చేస్తూ అందరినీ ఉత్సాహపరిచారు. ముషీరాబాద్ నియోజకవర్గం నాయకులను కలసిన అనంతరం ఓపెన్ ప్కారుపై నిలబడి ప్రజలకు అభివాదం చేస్తూ ముందుకు సాగారు. మోదీతో పాటు రాష్ట్ర అధ్యక్షుడు కిషన్ రెడ్డి, రాజ్యసభ సభ్యులు డా. లక్ష్మణలు ర్యాలీలో పాల్గొన్నారు. ముషీరాబాద్ నియోజకవర్గం బీజేపీ అభ్యర్థి పూస రాజు ఆధ్వర్యంలో ఆర్టీసీ క్రాస్ రోడ్స్‌లో వేదికను ఏర్పాటు చేసి మోదీకి మంగళవాయిద్యాలతో స్వాగతం పలికారు. ఈ సందర్భంగా ఏర్పాటు చేసిన లంబాడీ నృత్యాలు ఆకట్టుకున్నాయి. దారిపొడవునా బీజేపీ నాయకులు, కార్యకర్తలు పూల వర్షం కురిపిస్తూ మోదీకి ఘన స్వాగతం పలికారు. చిన్నా పెద్దా తేడా లేకుండా ప్రతి ఒక్కరూ మోదీని చూసేందుకు ఉత్సాహంగా తరలివచ్చారు. ప్రధాని మోదీ రోడ్ షో నేపథ్యంలో పోలీసులు పటిష్టమైన బందోబస్తును ఏర్పాటు చేశారు.
