తడాకా చూపిస్తామన్న మల్లన్న... కవిత ఇంటి వద్ద భారీ బందోబస్తు

దిశ, వెబ్ డెస్క్ : కాంగ్రెస్ ఎమ్మెల్సీ తీన్మార్ మల్లన్న(Teenmar Mallanna) (చింతపండు నవీన్) తన కార్యాలయంపై జరిగిన దాడి తర్వాత మీడియాతో మాట్లాడుతూ.. ఇకపై బీసీల తడాఖా చూపిస్తామని ఎమ్మెల్సీ కవిత(MLC Kavitha)కు, జాగృతి కార్యకర్తలకు వార్నింగ్ ఇచ్చిన సంగతి తెలిసిందే. ఈ క్రమంలో హైదరాబాద్‌లోని కవిత నివాసం, ఆఫీసు వద్ద భారీగా పోలీసు బందోబస్తు ఏర్పాటు చేశారు. రెండు రోజుల క్రితం ఓ సమావేశంలో ఎమ్మెల్సీ కవితపై అనుచిత వ్యాఖ్యలు చేశారని ఆగ్రహించిన జాగృతి కార్యకర్తలు తీన్మార్ మల్లన్న క్యూ న్యూస్ కార్యాలయంలోని ఫర్నిచర్ ధ్వంసం చేయగా, ఆయన గన్‌మెన్ గాలిలో ఐదు రౌండ్ల కాల్పులు జరిపారు.

ఈ దాడిని తనను చంపే కుట్రగా మల్లన్న ఆరోపిస్తూ... ఇకపై తఢాఖా చూపిస్తామని హెచ్చరించారు. ఈ నేపథ్యంలో కవిత నివాసం వద్ద ఉద్రిక్తతలు నెలకొనే అవకాశం ఉండటంతో పోలీసులు ఆమె ఇంటికి వెళ్లే మార్గాల్లో బారికేడ్లు ఏర్పాటు చేసి, వాహనాలను క్షుణ్ణంగా తనిఖీ చేస్తున్నారు. ఎలాంటి అవాంఛిత సంఘటనలను జరగకుండా ప్రత్యేక బృందాలను మోహరించారు.