Sonia Gupta: అటు విద్యార్థులు.. ఇటు ప్రొఫెసర్లు ఇద్దరికీ ప్రయోజనం.. లయన్ సోనియా గుప్తా

దిశ, డైనమిక్ బ్యూరో: ప్రతి విద్యార్థి తన జీవితంలో ఓ లక్ష్యం ఎంచుకొని ఆ దిశగా అడుగులు వేయాలని (Lions Clubs) లయన్స్ క్లబ్ ఇంటర్నేషనల్ ప్రతినిధి లయన్ సోనియా గుప్తా (Lion Sonia Gupta) స్పష్టం చేశారు. ఈ క్రమంలో నగరంలోని పద్మారావు నగర్ జ్యోతి మోడల్ హై స్కూల్లో శనివారం వ్యక్తిత్వ వికాస సెషన్‌లో ఆమె పాల్గొన్నారు. ఈ సందర్భంగా సోనియా గుప్తా మాట్లాడుతూ.. విద్యార్థులు కష్టపడి చదువుతూ వారి లక్ష్యాలను ఎలా సాధించాలో గుర్తించాలన్నారు. ప్రతి ఒక్కరి జీవిత వికాసంలో వ్యక్తిత్వం ప్రధాన పాత్ర పోషిస్తుందన్నారు. ఇందులో భాగంగా ఒక వ్యక్తి సంభాషించే విధానం, వివిధ పరిస్థితులకు వారు స్పందించే విధానం, అలాగే ఇతరులతో వారు సంభాషించే విధానం వంటి ల క్షణాలను అవగతం చేసుకోవాలన్నారు. ఏ వృత్తి అయినా సరే సదరు వ్యక్తి పనితీరు వారు తమను తాము ఎలా ప్రవర్తిస్తారనే దానిపై ఆధారపడి ఉంటుందన్నారు. మంచి వ్యక్తిత్వం ఉన్న వ్యక్తి ఎల్లప్పుడూ చెడు వ్యక్తిత్వం ఉన్న వ్యక్తి కంటే మంచిగా రాణిస్తున్నారు. విద్యార్థులు ఉత్తమ పౌరులుగా ఎదగడానికి ప్రతి పాఠశాలలో వ్యక్తిత్వ వికాసాన్ని బోధించడం చాలా ముఖ్యమని వివరించారు. వ్యక్తిత్వ వికాస సెషన్ల నుంచి అటు విద్యార్థులు ఇటు ప్రొఫెసర్లు ఇద్దరికీ వారి జీవితంలో ప్రయోజనం చేకూరుతుందని వివరించారు.

నైపుణ్యాలు మెరుగు :

విద్యార్థుల వ్యక్తిత్వ వికాస సెషన్లు వ్యక్తిత్వ నైపుణ్యాలను మెరుగుపరుస్తాయని లయన్ సోనియా గుప్తా తెలిపారు. విద్యార్థులు వారి ఆలోచనలు, భావాలు, ప్రవర్తన గురించి మరింత అవగాహన పొందడానికి ఈ సెషన్లు సహాయ పడతాయన్నారు. ప్రతి విద్యార్థి తన అంతర్గత పనితీరు గురించి అవగాహన పెంచుకున్నప్పుడు, వారి వ్యక్తిత్వాన్ని మెరుగుపరిచే మార్పులను ప్రారంభించవచ్చని తెలిపారు.