మీ సిబిల్ స్కోర్ తగ్గిందా..? హోమ్ లోన్ ఇవ్వరు జాగ్రత్త!

దిశ, తెలంగాణ బ్యూరో: సొంతింటి కలను నెరవేర్చుకోవాలనుకుంటున్నారా? సరిపడా డబ్బులుంటే పర్లేదు. కానీ.. లోన్ తీసుకోవాలనుకుంటే మాత్రం కాస్త ఆలోచించాల్సిందే. ఎందుకంటే మీ సిబిల్ స్కోర్ బాగా ఉంటేనే లోన్ ప్రాసెస్ ఈజీ అవుతుంది. లేదంటే కష్టమే! అందుకే ముందుగా మీ సిబిల్ స్కోర్ ఎలా ఉందో చెక్ చేసుకోండి. ఇది బాగుంటేనే వడ్డీ రేటు కూడా తగ్గిస్తారు. కాబట్టి మీరు లోన్ తీసుకోవాలనుకునే ప్లాన్ ఉంటే సరైన సిబిల్ స్కోర్ కూడా మెయింటైన్ చేయండి. ఇప్పటికే తీసుకున్న లోన్లను పూర్తిగా చెల్లించండి. అలాగే ఈఎంఐలను రెగ్యులర్‌గా చెల్లించండి. దీంతో సిబిల్ స్కోర్ బాగుంటుంది. అలాగే మీ సంపాదనపై 40% మించకుండా ఈఎంఐలు ఉండేలా చూసుకోవాలని ఫైనాన్షియల్ ఎక్స్‌పర్ట్స్ సూచిస్తున్నారు. అంతకు మించి ఈఎంఐలు చెల్లించాల్సి వస్తే పే చేయడంలో ఇబ్బందులు ఎదురై సిబిల్ స్కోర్ పడిపోవచ్చునని చెబుతున్నారు. సో.. స్థాయికి మించి రుణాలు తీసుకుంటే ఇబ్బందులు తప్పవు!

సిబిల్ స్కోర్ 750

బ్యాంకు రుణాలు తీసుకోవాలనుకున్న వ్యక్తుల సిబిల్ స్కోర్ 750 కంటే ఎక్కువగా ఉండాలి. ఇలా ఉండటమే చెల్లింపుల్లో తక్కువ రిస్క్‌గా భావిస్తారు. బ్యాంకర్లు కూడా రుణాలు ఇచ్చేందుకు పోటీ పడతారు. పైగా హోమ్‌లోన్లు తక్కువ వడ్డీ రేట్లకు అర్హత పొందే అవకాశం ఎక్కువగా ఉంటుంది. దీంతో 750 కంటే తక్కువ స్కోర్ ఉన్నవారు కూడా లోన్ పొందవచ్చు. కానీ వీరికి వడ్డీ రేటు ఎక్కువగా ఉంటుంది. ఇది సుదీర్ఘ కాల పరిమితిలో మొత్తం వ్యయాన్ని అధికంగా పెంచుతుంది. నిజానికి వడ్డీ రేటులో తేడా స్వల్పంగానే కనపడుతుంది. కానీ 15 నుంచి 20 ఏండ్ల కాల పరిమితిలో చెల్లించే మొత్తం చాలా ఎక్కువగానే ఉంటుంది.

అధిక వడ్డీ

ఎవరికైతే 700 నుంచి 725 వరకు సిబిల్ స్కోర్ ఉంటుందో వారు అధిక వడ్డీ రేటును చెల్లించాల్సి వస్తుంది. ఒకే ఆదాయం, ఒకే విలువ కలిగిన కొలేటరల్ ఉన్న ఇద్దరు రుణ గ్రహీతలు వారి క్రెడిట్ చరిత్ర ఆధారంగా ప్రత్యేకంగా వేర్వేరు రేట్లను పొందుతారు. ఉదాహరణకు 750 కంటే ఎక్కువ క్రెడిట్ స్కోరు ఉన్న రుణగ్రహీతకు 650-700 మధ్య క్రెడిట్ స్కోరు ఉన్న రుణగ్రహీతతో పోలిస్తే 50-100 బేసిస్ పాయింట్లు తక్కువ రేటును మంజూరు చేయొచ్చు. అలాగే ఉమ్మడిగా రుణం తీసుకునేటప్పుడు కూడా ఇద్దరి సిబిల్ స్కోర్లను వేర్వేరుగానే పరిగణనలోకి తీసుకుంటారు. అందుకే లోన్ తీసుకోవడానికి ముందుగానే క్రెడిట్ స్కోర్ పెంచుకోవాలి.

ఎలా పెంచుకోవాలి?

* క్రెడిట్ స్కోర్‌ పెరగాలంటే ఆర్థిక క్రమ శిక్షణ కలిగి ఉండాలి.

* ఈఎంఐలు, క్రెడిట్ కార్డ్ బిల్లులు రెగ్యులర్‌గా గడువు తేదీలోపు చెల్లించాలి.

* క్రెడిట్ వినియోగ నిష్పత్తి మీ మొత్తం అందుబాటులో ఉన్న క్రెడిట్ పరిమితికి, మీరు వినియోగిస్తున్న క్రెడిట్‌కు సంబంధించిన అంశం. మీకు అందుబాటులో ఉన్న మొత్తం క్రెడిట్ లో మీరు వినియోగించే మొత్తం 30 శాతం లోపే ఉండాలి. ఉదాహరణకు మీ మొత్తం క్రెడిట్ పరిమితి రూ.లక్ష అయితే, మీ బకాయి బ్యాలెన్స్‌ను రూ.30 వేల కంటే తక్కువగా ఉంచడానికి ప్రయత్నించండి. ఇప్పటికే ఉన్న క్రెడిట్ కార్డ్ రుణాన్ని చెల్లించడమనేది ఈ నిష్పత్తిని మెరుగుపరచడానికి గల వేగవంతమైన మార్గాలలో ఒకటిగా చెప్పొచ్చు.

* రుణ గ్రహీత కొత్త రుణం, క్రెడిట్ కార్డు కోసం దరఖాస్తు చేసుకున్న ప్రతీసారి ఎక్వైరీ చేస్తారు. ఇది కూడా స్కోరును తగ్గించవచ్చు. హోమ్‌లోన్ దరఖాస్తుకు ముందు నెలల్లో ఒకేసారి రెండు, మూడేసి క్రెడిట్ కార్డుల కోసం దరఖాస్తు చేసుకోవద్దు.

* కారు, బైక్ వంటి లోన్లు, పర్సనల్‌లోన్లు వివిధ క్రెడిట్ రకాల బాధ్యతాయుతమైన నిర్వహణను ప్రదర్శిస్తుంది. అయితే ఇది కాలక్రమేణా అవసరానుగుణంగా ఉండాలి తప్ప, అనవసరమైన రుణాలు తీసుకోవడం ద్వారా ఉండకూడదు.

*మీరు ఇప్పటికే చెల్లించిన రుణాలు లేదా తప్పుడు వ్యక్తిగత వివరాలు వంటి ఏవైనా తప్పుల కోసం మీ క్రెడిట్ నివేదికను క్రమం తప్పకుండా తనిఖీ చేస్తుండాలి. మీ స్కోరు మీ ఆర్థిక స్థితిని కచ్చితంగా ప్రతిబింబిస్తుందని నిర్ధారించుకోవడానికి ఇది చక్కటి మార్గం. ఈ అంశాలన్నీ సిబిల్ స్కోర్‌ను మెరుగుపరచడమే కాకుండా బలమైన ఆర్థిక పునాదిని కూడా నిర్మిస్తాయి. రుణగ్రహీతలు మెరుగైన రేట్లను పొందడానికి, గృహ రుణం జీవితకాల వ్యయాన్ని తగ్గించడానికి వీలు కల్పిస్తాయి.