ఆశావహులకు తీపికబురు.. పంచాయతీ డ్రాఫ్ట్ ఓటరు లిస్ట్ రిలీజ్

దిశ, తెలంగాణ బ్యూరో: గ్రామ పంచాయతీ ఎన్నికల ఓటరు జాబితా ముసాయిదాను ఎన్నికల సంఘం అధికారులు ప్రకటించారు. ప్రతి గ్రామ పంచాయతీ సర్పంచ్, వార్డుల వారీగా ఓటరు జాబితాను గురువారం విడుదల చేశారు. ముసాయిదా ఓటరు జాబితాను గ్రామ పంచాయతీ కార్యాలయం, మండల ప్రజా ప్రరిషత్​ కార్యాలయంలో అందుబాటులో ఉంచారు. ముసాయిదా ఓటరు జాబితా https://finalgprolls.tsec.gov.in/gpwardwisevoterlistrural1.do వెబ్‌సైట్‌లో ఓటరు జాబితా అందుబాటులో ఉంది. ఈ జాబితాను వార్డుల వారీగా రూపొందించారు. ఈ జాబితాపై ఎవరికైనా అభ్యంతరాలు ఉంటే ఈనెల 30వ తేదీ వరకు తెలపవచ్చు. ఈనెల 31న అభ్యంతరాలను డీపీవో పరిశీలిస్తారు. సెప్టెంబర్​2న తుది ఓటరు జాబితాను గ్రామ పంచాయతీ, వార్డుల వారీగా ప్రచురిస్తారు. ఓటరు జాబితా, పంచాయతీ ఎన్నికలకు పోలింగ్​కేంద్రాల నిర్ణయానికి శుక్రవారం జిల్లా స్థాయిలో, శనివారం మండల స్థాయిలో అన్ని రాజకీయ పార్టీల ప్రతినిధులతో సమావేశాన్ని నిర్వహిస్తారు. వారి అభిప్రాయాలు, సూచనలు పరిగణలోకి తీసుకుంటారు. ఓటరు జాబితాతో పాటుగా సెప్టెంబర్​ 2న పోలింగ్​ కేంద్రాల తుది జాబితాను ప్రకటిస్తారు.

ఫ్యామిలీ మెంబర్స్ అంతా ఒకే పోలింగ్ కేంద్రం పరిధిలోకి..

ముసాయిదా ఓటరు జాబితాను ప్రచురించడానికి మండల ప్రజాపరిషత్​ అధికారులు, గ్రామ పంచాయతీ కార్యదర్శులు పెద్ద కసరత్తే చేశారు. వార్డుల వారీగా జాబితాను తయారు చేసే సమయంలో ఒక కుటుంబంలోని సభ్యులందరూ ఒకే పోలింగ్​ కేంద్రం పరిధిలోకి వచ్చే విధంగా జాగ్రత్తలు తీసుకోవాలని, ఎన్నికల సంఘం స్పష్టమైన ఆదేశాలు జారీ చేసింది. దీంతో పంచాయతీ కార్యదర్శులు మరోసారి ఓటరు జాబితాను పరిశీలించి ఒక ఇంటి కుటుంబ సభ్యులందరూ ఒకే పోలింగ్​ కేంద్రం పరిధిలోకి వచ్చేలా ఏర్పాట్లు చేశారు. ఎన్నికల సంఘం ఆదేశాలకు అనుగుణంగా ప్రతి వార్డుకూ కనీసం ఒక పోలింగ్​ కేంద్రాన్ని ఏర్పాటు చేశారు. గరిష్ఠంగా 600 మంది ఓటర్లకు ఒక పోలింగ్​ కేంద్రాన్ని ఏర్పాటు చేశారు. 650 మంది కంటే ఎక్కువ ఓటర్లు ఉంటే రెండో పోలింగ్​ కేంద్రాన్ని ఏర్పాటు చేశారు. ఏదైనా ఒక వార్డులో 1300 మంది కంటే ఎక్కువ ఓటర్లు ఉంటే మూడో పోలింగ్ కేంద్రాన్ని ఏర్పాటు చేయాలని ఎన్నికల సంఘం సూచించింది. శివారు గ్రామానికి సంబంధించి అక్కడే పోలింగ్​కేంద్రాన్ని ఏర్పాటు చేశారు. పోలింగ్​కేంద్రం ఒక కిలోమీటరు దూరం కంటే ఎక్కువగా లేకుంటే.. ఉండేలా ఏర్పాటు చేయాలని సూచించారు. పోలింగ్ కేంద్రాలను మతపరమైన ప్రాముఖ్యత కలిగిన ప్రదేశాల్లో ఏర్పాటు చేయరాదని ఈసీ స్పష్టంచేసింది.