హృదయాలను కదిలిస్తున్న రైతన్న రోదన!

దిశ, డైనమిక్ బ్యూరో: సాగుకు నీళ్లు విడుదల చేయాలని ఓ రైతన్న నడిరోడ్డుపై ఏడుస్తున్న వీడియో అందరి హృదయాలను కలిచివేస్తుంది. మంథని పట్టణ కేంద్రంలోని ఇండియన్ ఆయిల్ పెట్రోల్ బంక్ వద్ద ఎండిపోతున్న వరి మొక్కలను చూపిస్తూ ఓ రైతు కంటతడి పెడుతూ రోదిస్తున్నారు. భూగర్భ జలాలు అట్టడుగుకు చేరడం, కాలువలు, బావుల్లో నీరు అడుగంటి పోవడంతో ఆరుగాలం పండించిన వరి పంట ఎండిపోతుందని మంథనికి చెందిన ఆ రైతన్న గురువారం తీవ్ర ఆవేదన వ్యక్తం చేశారు.

ఇకనైనా స్థానిక ప్రజాప్రతినిధులు, అధికారులు స్పందించి తమను ఆదుకోవాలని రైతు వేడుకుంటున్నారు. దీనికి సంబంధించిన వీడియో తాజాగా సోషల్ మీడియాలో వైరల్‌గా మారింది. రైతును చూసి నెటిజన్లు తీవ్ర ఆవేదన వ్యక్తం చేశారు.