'పోలవరం-బనకచర్ల'కు అనుమతివ్వకండి : కేంద్రానికి ఉత్తమ్ లేఖ

దిశ, వెబ్ డెస్క్ : తెలంగాణ నీటిపారుదల శాఖ మంత్రి ఉత్తమ్ కుమార్ రెడ్డి(Uttham Kumar Reddy), ఆంధ్రప్రదేశ్ ప్రభుత్వం చేపడుతున్న పోలవరం-బనకచర్ల(Polavaram-Banakacharla) లింక్ ప్రాజెక్టుకు పర్యావరణ అనుమతులు ఇవ్వకుండా ఆపాలని కోరుతూ కేంద్ర పర్యావరణ, అటవీశాఖ మంత్రి భూపేందర్ యాదవ్‌(Bhupendar Yadav)కు నేడు లేఖ రాశారు. ఈ ప్రాజెక్టు గోదావరి నది నీటిని (200 టీఎంసీ) పోలవరం నుంచి బనకచర్ల హెడ్ రెగ్యులేటర్‌కు మళ్లించాలని ప్రణాళికలు రచించింది. అయితే ఈ ప్రాజెక్ట్ గోదావరి నీటి వివాదాల ట్రిబ్యునల్(GWDT), ఆంధ్రప్రదేశ్ పునర్విభజన చట్టం(APRA) 2014కు విరుద్ధమని, అలాగే తెలంగాణ నీటి హక్కులకు భంగం కలిగించేలా ఉందని ఆరోపిస్తోంది.

మంత్రి ఉత్తమ్ కుమార్ రెడ్డి తన లేఖలో.. ఈ ప్రాజెక్టుకు ఆంధ్రప్రదేశ్ ప్రభుత్వం కేంద్ర జల సంఘ (CWC), గోదావరి నది నిర్వహణ బోర్డు (GRMB), పర్యావరణ అనుమతులు పొందలేదని పేర్కొంది. డీటైల్డ్ ప్రాజెక్ట్ రిపోర్ట్ (DPR)ను సైతం తెలంగాణతో పంచుకోలేదని తెలిపింది. ఈ ప్రాజెక్టు తెలంగాణలోని భద్రాచలం రామాలయం, మనుగూరులోని హెవీ వాటర్ ప్లాంట్, ITC సంస్థకు వరద ముప్పు వాటిల్లుతుందని ఆందోళన వ్యక్తం చేశారు. అంతేకాక, ఈ ప్రాజెక్టు గోదావరి బేసిన్ నుంచి నీటిని కృష్ణ, పెన్న బేసిన్‌లకు మళ్లించడం వల్ల తెలంగాణ రాష్ట్ర రిపేరియన్ హక్కులు ఉల్లంఘించబడతాయని, రాష్ట్రంలోని కరువు పీడిత ప్రాంతాలకు నీటి లభ్యత తగ్గుతుందని వాదించారు.

రేపటి ఎక్స్‌పర్ట్ అప్రైజల్ కమిటీ (EAC) సమావేశంలో ఈ ప్రాజెక్టు ప్రతిపాదనలను తిరస్కరించాలని, పర్యావరణ అనుమతులు ఇవ్వకుండా ఆంధ్రప్రదేశ్‌ను ఆపాలని కేంద్ర పర్యావరణ శాఖ మంత్రిని కోరారు. ఈ ప్రాజెక్టుకు ప్రీ-ఫీజిబిలిటీ రిపోర్ట్ (PFR) ఆమోదం కూడా లేకుండానే కేంద్రం DPR సమర్పించమని ఆంధ్రప్రదేశ్‌ను కోరడంపై కూడా అభ్యంతరం వ్యక్తం చేశారు. తెలంగాణ రాష్ట్ర ప్రయోజనాలను కాపాడేందుకు సుప్రీం కోర్టులో కూడా ఈ ప్రాజెక్టును సవాల్ చేయడానికి సిద్ధంగా ఉన్నట్లు ఉత్తమ్ కుమార్ రెడ్డి గతంలో పేర్కొన్నారు. ఈ లేఖకు ముందు, జనవరి 22న కేంద్ర జల శక్తి మంత్రి సీఆర్ పాటిల్‌కు, జూన్ 13న మరోసారి లేఖలు రాసి, ఈ ప్రాజెక్టును ఆపాలని కోరారు. గత BRS ప్రభుత్వం ఆంధ్రప్రదేశ్‌ను ఇలాంటి ప్రాజెక్టుల విషయంలో అడ్డుకోలేదని ఆరోపిస్తూ, కాంగ్రెస్ ప్రభుత్వం తెలంగాణ నీటి హక్కులను గట్టిగా కాపాడుతుందని ఉత్తమ్ కుమార్ రెడ్డి స్పష్టం చేశారు.