2047 ‘తెలంగాణ రైజింగ్’ ఉత్సవాలకు రాష్ట్రం సిద్ధం.. పాలసీల వెల్లువ ప్రకటించనున్న ప్రభుత్వం: డిప్యూటీ సీఎం

దిశ, తెలంగాణ బ్యూరో/ డైనమిక్ బ్యూరో: రాష్ట్ర ప్రభుత్వం డిసెంబరు 8, 9 తేదీల్లో భారీగా నిర్వహించనున్న ‘తెలంగాణ రైజింగ్ 2047 ఉత్సవాల్లో’ కీలక విధానాలను ప్రకటించనున్నట్లు డిప్యూటీ సీఎం భట్టి విక్రమార్క తెలిపారు. మంగళవారం బేగంపేట్‌లో జరిగిన 47వ SLBC త్రైమాసిక బ్యాంకర్ల సమావేశంలో పాల్గొన్న ఆయన, రాష్ట్ర అభివృద్ధిలో బ్యాంకులు కీలక భాగస్వాములవ్వాలని కోరారు. 2047 కోసం మూడు ట్రిలియన్ ఆర్థికవ్యవస్థ లక్ష్యంగా, 13% జీడీపీ వృద్ధి రోడ్‌మ్యాప్‌ను విడుదల చేయబోతున్నాం అని చెప్పారు. విద్యుత్ డిమాండ్ ఏటా 10% పెరుగుతున్న నేపథ్యంలో నాణ్యమైన విద్యుత్ సరఫరాపై ప్రభుత్వం ప్రధాన దృష్టి పెట్టిందన్నారు. గ్రామీణ ఆర్థికవ్యవస్థ, మౌలిక వసతులు, ఎంఎస్‌ఎంఈలు, మహిళా సంఘాల ఆర్థికాభివృద్ధి రాష్ట్ర భవిష్యత్తుకు పునాదిగా నిలుస్తాయని భట్టి విక్రమార్క తెలిపారు. SHGలు, MSMEలకు బ్యాంకులు విస్తృతంగా రుణాలు అందిస్తే ఉపాధి, సంపద పెరుగుతుందని సూచించారు.

13,000 కిలోమీటర్ల అంతర్గత రహదారి నిర్మాణం రూపాంతరక ప్రాజెక్ట్‌గా రాష్ట్ర ఆర్థిక పటాన్ని మార్చబోతుందని చెప్పారు. ఈ అవకాశాన్ని బ్యాంకులు ప్రాధాన్య రంగ రుణాల విస్తరణగా ఉపయోగించుకోవాలని తెలిపారు. వ్యవసాయ రంగంలో టర్మ్ లెండింగ్‌ను పెంచాలని కోరుతూ, ‘పంట రుణ మాఫీ, రైతు భరోసా, సాగునీటి ప్రాజెక్టులు, 24×7 ఉచిత విద్యుత్ వంటి ప్రభుత్వ చర్యలకు బ్యాంకుల భాగస్వామ్యం జతకలిస్తే రైతులు సంపన్న స్థాయికి ఎదుగుతారు’ అని అన్నారు. ఎంఎస్‌ఎంఈ రుణాల్లో ఆలస్యం, వర్కింగ్ క్యాపిటల్ కొరతను తగ్గించేందుకు CGTMSE, డిజిటల్ అసెస్‌మెంట్, క్లస్టర్ ఆధారిత రుణ విధానాలను మరింతగా వినియోగించాలని సూచించారు.

డిజిటల్ ఫైనాన్షియల్ ఇన్క్లూజన్, బీమా కవరేజ్, పీఎంజెడీవై అమలు వంటి రంగాల్లో మిగిలిన లోటులను బ్యాంకులు తొందరగా పరిష్కరించాలని సూచించారు. ‘తెలంగాణ భవిష్యత్‌కు సిద్ధమైన రాష్ట్రంగా మారుతోంది. ఈ విజన్ సాధనలో బ్యాంకులు లావాదేవీల స్థాయి నుంచి రూపాంతరక భాగస్వామ్య స్థాయికి ఎదగాలి. రాబోయే దశాబ్దాన్ని తెలంగాణ చరిత్రలో అత్యంత రూపాంతరక కాలంగా మలుద్దాం’ అని భట్టి విక్రమార్క పిలుపునిచ్చారు.