TG: రాత్రైనా పెట్రోల్ బంకుల్లో తగ్గని రద్దీ
తెలంగాణ వ్యాప్తంగా పెట్రోల్, డీజిల్ కొరత ఏర్పడటంతో వాహనదారులు తీవ్ర ఇబ్బందులు ఎదుర్కొంటున్నారు.
దిశ, వెబ్డెస్క్: తెలంగాణ వ్యాప్తంగా పెట్రోల్, డీజిల్ కొరత ఏర్పడటంతో వాహనదారులు తీవ్ర ఇబ్బందులు ఎదుర్కొంటున్నారు. రాష్ట్రంలోని ప్రధాన నగరాల నుంచి పల్లెల వరకు దాదాపు అన్ని పెట్రోల్ బంకుల వద్ద భారీ క్యూ లైన్లు కనిపిస్తున్నాయి. ఇంధన సరఫరాలో అంతరాయం ఏర్పడటంతో అనేక బంకులు ఇప్పటికే 'నో స్టాక్' బోర్డులను ప్రదర్శిస్తున్నాయి. హైదరాబాద్లోని గచ్చిబౌలి, కూకట్పల్లి, ఎల్బీనగర్ వంటి ప్రాంతాల్లో పెట్రోల్ బంకుల వద్ద కిలోమీటర్ల మేర వాహనాలు నిలిచిపోయాయి. ఉదయం నుంచి మొదలైన రద్దీ అర్ధరాత్రి దాటినా తగ్గడం లేదు. స్టాక్ ఎప్పుడు అయిపోతుందో అన్న ఆందోళనతో వాహనదారులు గంటల తరబడి వేచి చూస్తున్నారు. బంకుల బయట రోడ్ల మీదకే వాహనాలు క్యూ కట్టడంతో పలు చోట్ల ట్రాఫిక్ జామ్లు ఏర్పడుతున్నాయి. ఆఫీసులకు వెళ్లే ఉద్యోగులు, డెలివరీ బాయ్స్ మరియు అత్యవసర సేవల వాహనదారులు ఈ కొరతతో విలవిల్లాడుతున్నారు. "మూడు బంకులు తిరిగినా పెట్రోల్ దొరకలేదు, నాలుగో బంకు వద్ద గంట నుండి లైన్లో ఉన్నాను" అని ఒక వాహనదారుడు తన ఆవేదన వ్యక్తం చేశారు. పరిస్థితి ఇలాగే కొనసాగితే రవాణా రంగంపై తీవ్ర ప్రభావం పడే అవకాశం ఉందని నిపుణులు హెచ్చరిస్తున్నారు. ప్రభుత్వం తక్షణమే స్పందించి ఆయిల్ కంపెనీలతో మాట్లాడి సరఫరాను పునరుద్ధరించాలని ప్రజలు కోరుతున్నారు.
కొరతకు కారణం..
పశ్చిమాసియాలో నెలకొన్న ఉద్రిక్తతల కారణంగా అంతర్జాతీయంగా ఇంధన సరఫరా గొలుసు (Supply Chain) దెబ్బతినడం ఒక కారణమైతే, స్థానికంగా ఆయిల్ కంపెనీల నుంచి సరఫరా తగ్గడం మరో కారణమని తెలుస్తోంది. హోర్ముజ్ జలసంధి వద్ద ఏర్పడిన ఇంధన దిగ్బంధం ప్రభావం ఇప్పుడు నేరుగా సామాన్యుడిపై పడుతోంది.
