డ్రోన్ రివర్స్: కాంగ్రెస్ ఎమ్మెల్యేకు తప్పిన పెను ప్రమాదం

దిశ, డైనమిక్ బ్యూరో/దిశ, కుల్కచర్ల: వికారాబాద్ జిల్లా పరిగి ఎమ్మెల్యే టి.రామ్మోహన్ రెడ్డికి పెను ప్రమాదం తప్పింది. డ్రోన్ ప్రారంభోత్సవంలో అపశృతి చోటు చేసుకోవడంతో ఆయనకు స్వల్ప గాయాలయ్యాయి. ఆదివారం కుల్కచర్ల మండల కేంద్రంలో పలు అభివృద్ధి పనుల ప్రారంభోత్సవానికి వచ్చిన ఎమ్మెల్యే ఈ సందర్భంగా వ్యవసాయ శాఖ ఆధ్వర్యంలో ఏర్పాటు చేసిన డ్రోన్ పిచికారీ ప్రదర్శనలో పాల్గొన్నారు. ఈ క్రమంలో మందులు పిచికారి చేసే డ్రోన్ల పంపిణీని ప్రారంభించారు. ఆ సమయంలో డ్రోన్ గాలిలోకి ఎగిరినట్లే ఎగిరి తిరిగి అది నేరుగా ఎమ్మెల్యేపైకి దూసుకువచ్చింది. ఈ ఘటనలో డ్రోన్ రెక్కలు తగిలి ఎమ్మెల్యే రామ్మోహన్ రెడ్డికి గాయాలయ్యాయి. దీంతో వెంటనే అప్రమత్తమైన సిబ్బంది రామ్మోహన్ రెడ్డిని పరిగి ప్రభుత్వ ఆసుపత్రికి తరలించారు. అక్కడ ఎమ్మెల్యేకు వైద్యులు చికిత్స అందించారు. ప్రస్తుతం ఎమ్మెల్యే ఆరోగ్యం నిలకడగానే ఉందని వైద్యులు తెలిపారు.