రాష్ట్రంలో 1.28 లక్షల పెన్షన్లు రద్దు.. 48 వేల మంది అర్హులతో కొత్త జాబితా రెడీ

దిశ, వెబ్‌డెస్క్: తెలంగాణలో సంక్షేమ పెన్షన్ల పంపిణీపై సర్కార్ కీలక నిర్ణయం తీసుకుంది. అర్హులైన ప్రతి ఒక్కరికీ న్యాయం చేయాలనే లక్ష్యంతో ఇటీవల చేపట్టిన సమగ్ర పెన్షన్ల వెరిఫికేషన్ (Pension Verification) ప్రక్రియ ముగిసింది. ఈ తనిఖీల్లో పెద్ద ఎత్తున అక్రమాలు, నిబంధనల ఉల్లంఘనలు వెలుగుచూడటంతో అధికారులు ఏకంగా 1.28 లక్షల పెన్షన్లను రద్దు చేశారు. అయితే, ఇదే సమయంలో నిజమైన లబ్ధిదారులకు మేలు చేకూరుస్తూ 48 వేల మందితో కూడిన సరికొత్త జాబితాను కూడా అధికారులు సిద్ధం చేశారు.

అనర్హుల తొలగింపునకు కారణాలు ఇవే..

వివిధ రకాల పెన్షన్ల విషయంలో క్షేత్రస్థాయిలో విచారణ జరిపిన అధికారులు.. మృతులు, సుదీర్ఘకాలంగా అందుబాటులో లేనివారు, వలస వెళ్లిన వారి పేర్లను లబ్ధిదారుల జాబితా నుంచి తొలగించారు. అదేవిధంగా ప్రభుత్వ నిబంధనలకు విరుద్ధంగా పెన్షన్లు పొందుతున్న ప్రభుత్వ ఉద్యోగుల తల్లిదండ్రులు, 5 ఎకరాలకు పైగా వ్యవసాయ భూమి ఉన్న సంపన్నులు, ఆదాయపు పన్ను (Tax Payers) చెల్లిస్తున్న వారిని గుర్తించి వారి పెన్షన్లను కట్ చేశారు. రద్దు అయిన మొత్తం 1.28 లక్షల పెన్షన్లలో అత్యధికంగా 1.02 లక్షల పెన్షన్లు గ్రామీణ ప్రాంతాలకు చెందినవి కాగా.. మిగిలినవి మున్సిపాలిటీల పరిధిలోనివి

కొత్తగా 48 వేల మందికి లబ్ధి..

అయితే, అనర్హుల తొలగింపుతో ప్రభుత్వ ఖజానాపై భారం తగ్గడమే కాకుండా, కొత్త వారికి అవకాశం లభించింది. అర్హత ఉండి కూడా ఇంతకాలం పెన్షన్లు రాని 48 వేల మంది వికలాంగులు (Divyangjan), వితంతువుల (Widows) పేర్లతో అధికారులు కొత్త జాబితాను రెడీ చేశారు. రాష్ట్ర ఆర్థిక శాఖ నుంచి ఆమోదం లభించిన వెంటనే కొత్త లబ్ధిదారులకు పెన్షన్ల మంజూరుకు అధికారిక ఉత్తర్వులు వెలువడనున్నాయి.