ఎఫ్‌ఐహెచ్ ప్రొ లీగ్‌లో 3-2తో ఓడిన భారత అమ్మాయిలు

దిశ, స్పోర్ట్స్: భారత మహిళల హాకీ జట్టుకు ఎఫ్ఐహెచ్ ప్రో లీగ్‌లో ఓటమి ఎదురైంది. లండన్ వేదికగా ఆస్ట్రేలియాతో జరిగిన మ్యాచులో భారత్ 3-2 తేడాతో ఓటమి చవిచూసింది. ఆసీస్ తరఫున కర్ట్‌నీ షోనెల్ (16వ నిమిషం), లెక్సీ పికెరింగ్ (26వ నిమిషం), టాటుమ్ స్టివార్ట్ (35వ నిమిషం) గోల్స్ చేశారు. భారత్‌కు దక్కిన పెనాల్టీ కార్నర్‌లను దీపిక, నేహా గోల్స్‌గా మలిచారు. అయితే ఆ తర్వాత ఆసీస్ డిఫెన్స్‌ను బ్రేక్ చేయడంలో భారత జట్టు విఫలమైంది. చివరి క్వార్టర్‌లో కూడా భారత్‌కు మరో రెండు పెనాల్టీ కార్నర్‌లు లభించాయి. కానీ వాటిని గోల్స్‌గా మలచడంలో భారత అమ్మాయిలు ఫెయిలయ్యారు. దీంతో ఎంత పోరాడినా భారత్‌కు ఓటమి తప్పలేదు.