ఫిఫా వరల్డ్ కప్: పనామా ఔట్.. క్రొయేషియా సూపర్ విక్టరీ.. సజీవంగా నాకౌట్ ఆశలు!

దిశ, డైనమిక్ బ్యూరో: ఫిఫా ఫుట్‌బాల్ వరల్డ్ కప్-2026లో భాగంగా గ్రూప్-ఎల్ లో జరిగిన కీలక పోరులో క్రొయేషియా సత్తా చాటింది. భారత కాలమాన ప్రకారం.. బుధవారం టొరంటో స్టేడియం వేదికగా జరిగిన మ్యాచ్‌లో పనామాపై 1-0 తేడాతో ఉత్కంఠ విజయం సాధించింది. ఈ విజయంతో టోర్నీలో తొలి పాయింట్ల (3) ఖాతా తెరిచిన క్రొయేషియా.. తన నాకౌట్ ఆశలను సజీవంగా ఉంచుకుంది. మరోవైపు, వరుసగా రెండో మ్యాచ్‌లోనూ ఓడిన పనామా టోర్నీ నుంచి నిష్క్రమించింది.

బుడిమిర్ మ్యాజిక్.. మోడ్రిచ్ రికార్డ్

తొలి భాగంలో ఇరు జట్లు గోల్ చేయలేకపోయాయి. అయితే 54వ నిమిషంలో జోసిప్ స్టానిసిక్ అందించిన చక్కటి పాస్‌ను, సబ్‌స్టిట్యూట్‌గా బరిలోకి దిగిన ఆంటె బుడిమిర్ (Ante Budimir) అద్భుతమైన గోల్‌గా మలిచి క్రొయేషియాకు ఆధిక్యాన్ని అందించాడు. క్రొయేషియా స్టార్ కెప్టెన్ లూకా మోడ్రిచ్‌కు ఇది 200వ అంతర్జాతీయ మ్యాచ్ కావడంతో రికార్డు సాధించాడు. తనకు మైలురాయిగా నిలిచే ఈ మ్యాచ్‌లో జట్టుకు విజయం దక్కడంతో మోడ్రిచ్ ఆనందంతో సంబరాలు చేసుకున్నాడు.

అడ్డుగోడలా లివాకోవిచ్..

మ్యాచ్ మొదటి భాగంలో (23వ నిమిషం), అలాగే రెండో భాగంలో (67వ నిమిషం) పనామా ఆటగాళ్లు చేసిన ప్రమాదకరమైన దాడులను క్రొయేషియా గోల్ కీపర్ డొమినిక్ లివాకోవిచ్ అద్భుతమైన సేవ్స్‌తో అడ్డుకుని జట్టు విజయంలో కీలక పాత్ర పోషించాడు.

ఆఖరి పోరు అత్యంత కీలకం..

ప్రస్తుతం గ్రూప్-ఎల్‌లో ఇంగ్లండ్, ఘనా చెరో 4 పాయింట్లతో ఉండగా, క్రొయేషియా 3 పాయింట్లతో ఉంది. శనివారం ఫిలడెల్ఫియాలో పటిష్టమైన ఘనాతో క్రొయేషియా తన ఆఖరి లీగ్ మ్యాచ్ ఆడనుంది. నాకౌట్ చేరాలంటే క్రొయేషియాకు ఈ మ్యాచ్ అత్యంత కీలకం కానుంది. అదే రోజు ఇంగ్లండ్ జట్టు.. పనామాతో తలపడనుంది.