భారత సైన్యానికి అదనపు బలం.. 2,000 'ప్రహార్' మెషిన్ గన్లను అందజేసిన అదానీ డిఫెన్స్
భారత సైన్యానికి 2,000 'ప్రహార్' మెషిన్ గన్ల అందజేత. గడువు కంటే 11 నెలల ముందే అదానీ డిఫెన్స్ అద్భుత ఘనత. మేక్ ఇన్ ఇండియాలో మరో కీలక మైలురాయి.
దిశ, వెబ్ డెస్క్: భారత సైన్యానికి అదానీ డిఫెన్స్ అందజేసిన మెషిన్ గన్ (Machine guns)లతో సైన్యానికి అదనపు బలం వచ్చి చేరింది. దీంతో మేక్ ఇన్ ఇండియా' నినాదంతో రక్షణ రంగంలో భారత్ మరో భారీ అడుగు వేసింది. ప్రముఖ రక్షణ రంగ సంస్థ అదానీ డిఫెన్స్ అండ్ ఏరోస్పేస్ (Adani Defense and Aerospace), శనివారం భారత సైన్యానికి 2,000 'ప్రహార్' లైట్ మెషిన్ గన్ల (LMG) తొలి బ్యాచ్ను విజయవంతంగా అందజేసింది. గ్వాలియర్ శివార్లలోని అదానీ స్మాల్ ఆర్మ్స్ కాంప్లెక్స్లో పూర్తి స్వదేశీ పరిజ్ఞానంతో తయారైన ఈ ఆయుధాల పంపిణీ కార్యక్రమం ఘనంగా జరిగింది. ఈ సందర్భంగా ఏర్పాటు చేసిన కార్యక్రమంలో రక్షణ మంత్రిత్వ శాఖ డీజీ (అక్విజిషన్) ఏ. అన్బరసు, అదానీ డిఫెన్స్ సీఈవో ఆశిష్ రాజ్వంశీ పాల్గొని, ఈ అత్యాధునిక ఆయుధాలను సైన్యానికి అధికారికంగా అప్పగించారు.
ఈ 'ప్రహార్' మెషిన్ గన్లు 7.62 mm కాలిబర్ సామర్థ్యం కలిగి ఉండి, ఆధునిక యుద్ధ తంత్రాలకు అనుగుణంగా రూపొందించబడ్డాయి. ముఖ్యంగా ఈ ఆయుధాల సరఫరాను ఒప్పందం ప్రకారం నిర్ణయించిన గడువు కంటే దాదాపు 11 నెలల ముందే పూర్తి చేయడం విశేషం. మొత్తం 41,000 ఎల్ఎమ్జీల తయారీకి ఆర్డర్ ఉండగా, అందులో భాగంగానే ఈ తొలి విడతను అదానీ డిఫెన్స్ అందజేసింది. రాబోయే మూడేళ్లలో పూర్తి ఆర్డర్ను పూర్తి చేస్తామని సంస్థ ప్రతినిధులు వెల్లడించారు. గ్వాలియర్లోని ఈ తయారీ కేంద్రం ఏటా ఒక లక్ష ఆయుధాలను ఉత్పత్తి చేసే సామర్థ్యం కలిగి ఉండటం రక్షణ రంగంలో భారత్ సాధిస్తున్న పురోగతికి నిదర్శనం.
అలాగే సరిహద్దుల్లో మోహరించిన భారత సైనికుల ఫైర్ పవర్ను పెంచడంలో ఈ 'ప్రహార్' గన్లు కీలక పాత్ర పోషించనున్నాయి. ఇజ్రాయెల్ వెపన్ ఇండస్ట్రీస్ (IWI) సహకారంతో సాంకేతిక పరిజ్ఞానాన్ని బదిలీ చేసుకుని, భారత్లో 'నెగెవ్ NG7' మోడల్ ఆధారంగా వీటిని రూపొందించారు. రక్షణ రంగంలో ప్రైవేటు భాగస్వామ్యం పెరగడం వల్ల తక్కువ సమయంలో నాణ్యమైన ఆయుధాలు సైన్యానికి అందుతున్నాయని డీజీ అన్బరసు ఈ సందర్భంగా కొనియాడారు. ఈ చర్య ద్వారా విదేశీ ఆయుధాల దిగుమతి పై ఆధారపడటం తగ్గుతుందని, 'ఆత్మనిర్భర్ భారత్' లక్ష్యానికి మరింత బలం చేకూరుతుందని అధికారులు ఆశాభావం వ్యక్తం చేశారు.
