PJR Flyover : ఆ ఫ్లైఓవర్‌కు పీజేఆర్ పేరు.. జూన్ 28న ప్రారంభించనున్న సీఎం రేవంత్ రెడ్డి

దిశ, సిటీ బ్యూరో : శిల్పా లేఅవుట్ రెండో దశ ఫ్లైఓవర్‌కు సీఎల్పీ మాజీ నేత పీ జనార్దన్ రెడ్డి పేరు పెట్టాలని ముఖ్యమంత్రి అనుముల రేవంత్ రెడ్డి నిర్ణయించారు. ఈ ఫ్లైఓవర్ ను ఈ నెల 28న ప్రారంభించనున్నట్టు మేయర్ గద్వాల విజయలక్ష్మి ‘ఎక్స్ ’లో ప్రకటించారు. కొండాపూర్ నుంచి గచ్చిబౌలి వరకు అనుసంధానించే పీజేఆర్ (పీ జనార్ధన్ రెడ్డి) ఫ్లైఓవర్‌ అందుబాటులోకి రానుందని తెలిపారు. ప్రఖ్యాత రాజకీయ నాయకుడు, ప్రజా సేవకుడు పీ జనార్ధన్ రెడ్డికి జ్ఞాపకార్థంగా ఫ్లైఓవర్ కు ఆయన పేరు పెట్టాలని సీఎం రేవంత్ రెడ్డి సూచించారని తెలిపారు. ప్రారంభోత్సవానికి ముందే పెయింటింగ్, సుందరీకరణ సహా అన్ని పనులను పూర్తి చేయాలని మేయర్ గద్వాల్ విజయలక్ష్మి జీహెచ్‌ఎంసీ కమిషనర్ ఆర్వీ కర్ణన్ ను ఆదేశించారు. ఈ కీలకమైన మౌలిక సదుపాయాల ప్రాజెక్ట్ ట్రాఫిక్ రద్దీని గణనీయంగా తగ్గిస్తుందని, ప్రయాణికులకు సున్నితమైన, వేగవంతమైన ప్రయాణ అనుభవాన్ని అందిస్తుందని మేయర్ వెల్లడించారు. హైదరాబాద్ పౌరులకు ప్రయోజనం చేకూర్చే నాణ్యమైన మౌలిక సదుపాయాల ప్రాజెక్టులను అందించడానికి జీహెచ్‌ఎంసీ కట్టుబడి ఉందని మేయర్ తెలిపారు.