అక్కినేని జీవన సాఫల్య అవార్డుకు ‘భగీరథ’

దిశ, సినిమా : పద్మవిభూషణ్ అక్కినేని నాగేశ్వరావు పేరిట శృతిలయ ఆర్ట్స్ అకాడమీ ఏర్పాటుచేసిన ఉత్తమ పాత్రికేయ జీవన సాఫల్య పురస్కారానికి ఈ ఏడాది సీనియర్ పాత్రికేయుడు భగీరథను ఎంపిక చేశామని అవార్డు కమిటీ చైర్మన్ డాక్టర్ మహ్మద్ రఫీ తెలిపారు. శృతిలయ ఆర్ట్స్ అకాడమీ గత రెండు దశాబ్దాలుగా ఎందరో సినీ ప్రముఖులను, సేవా మూర్తులను సత్కరిస్తూ యువతరానికి స్ఫూర్తినిస్తోందన్నారు. ఈ సంస్థ నిర్వాహకురాలు, గాయకురాలు ఆమని తెలంగాణ ప్రభుత్వ బిసి సంక్షేమశాఖలో ఉన్నతాధికారిణిగా పనిచేస్తున్నారన్న ఆయన.. 2001లో శృతిలయ ఆర్ట్స్ అకాడమీ సంస్థను డాక్టర్ అక్కినేని నాగేశ్వరరావు ప్రారంభించారని తెలిపారు.

ఆ కృతజ్ఞతతో డాక్టర్ అక్కినేని నాగేశ్వరరావు పేరిట ఆయన పుట్టిన రోజు(సెప్టెంబర్ 20)న పాత్రికేయులను సత్కరిస్తూ వస్తున్నామన్నారు. సినిమా పాత్రికేయునిగా నాలుగు దశాబ్దాల అనుభవమున్న భగీరథ గారిని ఈ నెల 20న రవీంద్ర భారతిలో సత్కరించనున్నట్లు వెల్లడించారు.