నాచు వల్ల వాగులోకి దూసుకెళ్లిన ఆర్టీసీ బస్సు.. తప్పిన పెను ప్రమాదం

దిశ, కొడిమ్యాల: వేములవాడ నుంచి జగిత్యాల వెళ్లే మార్గమధ్యలో కొడిమ్యాల నాచుపల్లి వద్ద ఉన్న చిలుకవాగులో బస్సు అదుపు తప్పి వాగులోకి దూసుకెళ్లింది. ఈ ప్రమాదంలో ఎవరు గాయపడనప్పటికీ అనుకోకుండా జరిగిన ఈ పరిణామానికి ప్రయాణికులు భయాందోళన చెందారు. గతంలో కురిసిన భారీవర్షాలకు చిలుకవాగు ఉప్పొంగి ప్రవహిస్తోంది. కొద్దిరోజుల నుంచి ఈ రోడ్డును అధికారులు తాత్కాలికంగా మూసివేశారు. వరద ఉధృతి తగ్గడంతో వాహనాలను అనుమతించినప్పటికీ రోడ్డుపైన గుంతలు పడి నాచు తయారై పూర్తిగా పాడైన కారణంగా తరచూ ప్రమాదాలు జరుగుతున్నాయి. అధికారులు వెంటనే స్పందించి ఇక ముందు ఇలాంటి ఘటనలు జరగకుండా ప్రత్యామ్నాయ చర్యలు చేపట్టాలని, వరద నీరు తగ్గిన వెంటనే వాగుపై బ్రిడ్జి నిర్మాణం చేపట్టాలని చుట్టుపక్కల గ్రామాల ప్రజలు కోరుతున్నారు.