కార్పొరేట్ బడ్జెట్‌ను తలపిస్తున్న వార్షిక బడ్జెట్..
దిశ, సినిమా : కేంద్రం ప్రవేశపెట్టిన వార్షిక బడ్జెట్ కార్పొరేట్ బడ్జెట్‌ను తలపిస్తుందన్నారు ప్రముఖ సినీనటులు, దర్శక నిర్మాత, సామాజిక విశ్లేషకులు ఆర్. నారాయణమూర్తి. బడ్జెట్‌లో రైతులకు గిట్టుబాటు ధర కల్పించే అంశాన్నే ప్రస్తావించలేదన్న ఆయన.. డాక్టర్ స్వామినాథన్ ప్రతిపాదనల మేరకు బడ్జెట్ కేటాయిస్తే రైతులకు రుణాలు ఇవ్వాల్సిన అవసరం లేదన్నారు.
తెలుగు రాష్ట్రాలను విస్మరించి ఎన్నికలు జరగబోతున్న రాష్ట్రాలకు అనుకూలంగా కేంద్ర బడ్జెట్ రూపొందించారన్న నారాయణ మూర్తి.. జీఎస్టీ, సెస్‌లను కేంద్ర పరిధిలోకి తీసుకెళ్తే రాష్ట్రాలు సంక్షేమ పథకాలను ఎలా అమలు చేస్తాయని ప్రశ్నించారు. ప్రభుత్వ రంగ సంస్థలను కుప్పకూల్చి ప్రైవేటుపరం చేస్తే, కార్పొరేట్ శక్తులు పంచభూతాలను కూడా అమ్ముకుంటాయని, అప్పుడు సామాన్యుడి పరిస్థితి ఏంటని ప్రశ్నించారు. కేంద్రం అన్ని రాష్ట్రాలను సమంగా చూడాలని కోరారు. తాను నిర్మిస్తున్న ‘రైతు అన్న’ సినిమా ప్రస్తుతం ఫైనల్ మిక్సింగ్ జరుగుతోందని.. ఫిబ్రవరి నెలాఖరున లేదా మార్చి ప్రథమార్థంలో చిత్రాన్ని విడుదల చేస్తామని తెలిపారు.
