ప్లాట్‌ఫామ్ ఫీజు పెంచిన జొమాటో.. ఇకపై ఫుడ్ ఆర్డర్ మరింత భారం!

దిశ, డైనమిక్ బ్యూరో: ఆన్‌లైన్‌లో ఆహారాన్ని ఆర్డర్ చేసే ‘ఫుడ్ లవర్స్’కు ప్రముఖ డెలివరీ సంస్థ జొమాటో (Zomato) గట్టి షాక్ ఇచ్చింది. తన ప్లాట్‌ఫామ్ ఫీజును భారీగా పెంచుతూ వినియోగదారులపై అదనపు భారాన్ని మోపింది. తాజాగా పెంచిన ధరల ప్రకారం, ఇకపై ప్రతి ఆర్డర్‌పై వినియోగదారులు అదనంగా రూ. 2.40 చెల్లించాల్సి ఉంటుంది. ఇప్పటివరకు జొమాటో ఒక్కో ఆర్డర్‌పై రూ. 12.50 (GST కాకుండా) ప్లాట్‌ఫామ్ ఫీజుగా వసూలు చేసేది. అయితే, మారిన నిబంధనల ప్రకారం ఈ రుసుమును రూ. 14.90కి పెంచుతున్నట్లు కంపెనీ తన యాప్‌లో అధికారికంగా వెల్లడించింది. సాధారణంగా జొమాటో, దాని ప్రధాన ప్రత్యర్థి సంస్థ స్విగ్గీ (Swiggy) ఒకే రకమైన ధరల విధానాన్ని అనుసరిస్తుంటాయి. ప్రస్తుతం స్విగ్గీ కూడా పన్నులతో కలిపి సుమారు రూ. 14.99 వసూలు చేస్తోంది. ఇప్పుడు జొమాటో కూడా అదే బాటలో పయనిస్తుండటం గమనార్హం.

పెంపునకు కారణమేంటి?

పశ్చిమాసియాలో నెలకొన్న ఉద్రిక్త పరిస్థితుల కారణంగా అంతర్జాతీయ మార్కెట్‌లో చమురు ధరలు మండిపోతున్నాయి. పెరుగుతున్న ఇంధన ధరలు డెలివరీ కార్యకలాపాలపై తీవ్ర ప్రభావం చూపుతున్నాయి. ఈ పెరిగిన వ్యయాన్ని భర్తీ చేసుకునేందుకే ప్లాట్‌ఫామ్ ఫీజును పెంచాలని కంపెనీ నిర్ణయించినట్లు విశ్లేషకులు భావిస్తున్నారు. కాగా, జొమాటో చివరిసారిగా 2025 సెప్టెంబర్‌లో ఫీజులను సవరించింది.