Sonam Wangchuk: సోనమ్ వాంగ్చుక్ నిరాహారదీక్ష విరమించుకోవాలని కాంగ్రెస్ విజ్ఞప్తి
ఈ విషయంలో వాంగ్చుక్ పడుతున్న ఆవేదనను మేము కూడా పంచుకుంటున్నాము' అని కాంగ్రెస్ స్పష్టం చేసింది.
దిశ, నేషనల్ బ్యూరో: దేశంలో వరుసగా జరుగుతున్న పరీక్షా పత్రాల లీకేజీలు, విద్యార్థుల ఆత్మహత్యల నేపథ్యంలో కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలంటూ సామాజిక కార్యకర్త సోనమ్ వాంగ్చుక్ చేపట్టిన నిరాహార దీక్ష 19వ రోజుకు చేరుకుంది. ఆయన క్షీణిస్తున్న ఆరోగ్య పరిస్థితిపై తీవ్ర ఆందోళన వ్యక్తం చేసిన కాంగ్రెస్ పార్టీ, దీక్షను విరమించుకోవాలని వాంగ్చుక్కు బహిరంగ విజ్ఞప్తి చేసింది. 'దేశంలో విద్యా వ్యవస్థ కుప్పకూలడానికి నరేంద్ర మోడీ ప్రభుత్వ బాధ్యతారాహిత్యమే కారణం. ఈ విషయంలో వాంగ్చుక్ పడుతున్న ఆవేదనను మేము కూడా పంచుకుంటున్నాము' అని కాంగ్రెస్ స్పష్టం చేసింది. పార్లమెంట్లోనూ, వెలుపలా కేంద్ర ప్రభుత్వాన్ని ఎండగట్టేందుకు ప్రతిపక్షాలన్నీ ఏకతాటిపై ఉన్నాయని భరోసా ఇస్తూ, వాంగ్చుక్ ఆందోళనలు దేశ ప్రజలందరి ఆందోళనలేనని కాంగ్రెస్ సీనియర్ నేత కేసీ వేణుగోపాల్ సోషల్ మీడియా ప్లాట్ఫామ్ ఎక్స్లో పేర్కొన్నారు.
ప్రతిపక్షాల ఐక్య పోరాటం
ఈ లీకేజీల వ్యవహారంపై కాంగ్రెస్తో పాటు దేశంలోని ప్రధాన ప్రతిపక్షాలన్నీ తీవ్ర వ్యతిరేకతతో ఉన్నాయి. కేసీ వేణుగోపాల్ మాట్లాడుతూ, నెలన్నర రోజులుగా కాంగ్రెస్ పార్టీ విద్యాశాఖ మంత్రి రాజీనామాను గట్టిగా డిమాండ్ చేస్తోందని, వాంగ్చుక్ పోరాటానికి తమ మద్దతు ఎప్పుడూ ఉంటుందని స్పష్టం చేశారు. మరోవైపు, ఈ పోరాటంలో వాంగ్చుక్కు జమ్మూ కాశ్మీర్ ముఖ్యమంత్రి ఒమర్ అబ్దుల్లా నుండి కూడా మద్దతు లభించింది. దాదాపు 9 కిలోల బరువు తగ్గి చావుబతుకుల్లో ఉన్న ఒక నిరసనకారుడితో మాట్లాడేందుకు కనీస ప్రయత్నం కూడా చేయని మోడీ ప్రభుత్వంపై ఆయన మండిపడ్డారు. గతంలో యూపీఏ ప్రభుత్వ హయాంలో అన్నా హజారే దీక్ష చేసినప్పుడు అప్పటి ప్రధాని మన్మోహన్ సింగ్ స్వయంగా మంత్రులను పంపి చర్చలు జరిపిన విషయాన్ని అబ్దుల్లా గుర్తు చేశారు. రాజీనామా కేవలం ఆరంభం మాత్రమేనని, విద్యా వ్యవస్థలో సమూల మార్పుల కోసం తమలాంటి మేధావులను ప్రభుత్వం చర్చలకు పిలవాలని వాంగ్చుక్ డిమాండ్ చేస్తున్నారు.
