US Court: హెచ్-1బీ వీసాపై 1,00,000 డాలర్ల రుసుముకు అమెరికా కోర్టు బ్రేక్

దిశ, నేషనల్ బ్యూరో: అమెరికాలో కొత్త హెచ్-1బీ వీసాలపై 1,00,000 డాలర్ల రుసుము విధించాలన్న అమెరికా అధ్యక్షుడు డొనాల్డ్ ట్రంప్ ప్రభుత్వ ప్రయత్నానికి మరోసారి ఎదురుదెబ్బ తగిలింది. బోస్టన్‌లోని ఫస్ట్ సర్క్యూట్ కోర్ట్ ఆఫ్ అప్పీల్స్, ఆ రుసుమును రద్దు చేసిన డిస్ట్రిక్ట్ కోర్టు తీర్పుపై స్టే ఇవ్వాలన్న కేంద్ర ప్రభుత్వ అభ్యర్థనను తిరస్కరించింది. కాంగ్రెస్ స్పష్టంగా అధికారం ఇవ్వకుండా ప్రభుత్వం ఇలాంటి భారీ ఆర్థిక భారం ప్రజలపై మోపలేదని న్యాయమూర్తులు స్పష్టం చేశారు. గత ఏడాది సెప్టెంబర్‌లో ట్రంప్ ప్రభుత్వం కొత్త హెచ్-1బీ వీసాలకు 1,00,000 డాలర్లు రుసుము విధిస్తూ ఉత్తర్వులు జారీ చేయగా, డెమోక్రాట్ పార్టీ పాలిత 20 రాష్ట్రాలు దీన్ని కోర్టులో సవాల్ చేశాయి. జూన్ 8న డిస్ట్రిక్ట్ జడ్జి లియో టి. సోరోకిన్ ఆ రుసుము చట్టవిరుద్ధమని తీర్పు ఇవ్వగా, దానిపై స్టే కోరిన ప్రభుత్వ వాదనలను అప్పీల్స్ కోర్టు అంగీకరించలేదు. సైద్ధాంతిక, సాంకేతిక నైపుణ్యం కలిగిన విదేశీ ఉద్యోగులను అమెరికా కంపెనీలు నియమించుకునే హెచ్-1బీ వీసాపై ఈ వివాదం నేరుగా ప్రభావం చూపుతోంది. భారత్, చైనా వంటి దేశాల నుంచి ఐటీ నిపుణులను నియమించుకోవడంలో ఈ వీసా కీలక పాత్ర పోషిస్తుండటంతో, ఈ కేసు తుది తీర్పు టెక్నాలజీ రంగంతో పాటు వేలాది విదేశీ ఉద్యోగులపై ప్రభావం చూపే అవకాశం ఉంది.