Viral: గోవా బీచ్లో ఇరుక్కుపోయిన ఫార్చూనర్.. సముద్రంలోకి కారును తీసుకెళ్లిన పర్యాటకులు
గోవాలోని వాగేటర్ బీచ్లో పర్యాటకులు అత్యుత్సాహం ప్రదర్శించారు. నిబంధనలను తుంగలో తొక్కుతూ సముద్రపు నీటిలోకి టయోటా ఫార్చూనర్ () కారును తీసుకెళ్లారు.
దిశ, డైనమిక్ బ్యూరో: గోవాలోని వాగేటర్ (Vagator) బీచ్లో పర్యాటకులు అత్యుత్సాహం ప్రదర్శించారు. నిబంధనలను తుంగలో తొక్కుతూ సముద్రపు నీటిలోకి టయోటా ఫార్చూనర్ (Toyota Fortuner) కారును తీసుకెళ్లారు. చివరికి ఆ కారు తడి ఇసుకలో కూరుకుపోయింది. గుజరాత్ (GJ) రిజిస్ట్రేషన్ ఉన్న ఈ కారుకు సంబంధించిన వీడియో ప్రస్తుతం సోషల్ మీడియాలో వైరల్గా మారింది. గోవా బీచ్లకు దేశ విదేశాల నుంచి పర్యాటకుల తాకిడి పెరిగింది. అయితే, కొందరు పర్యాటకులు బాధ్యతారాహిత్యంగా ప్రవర్తిస్తుండటం భద్రతా, పర్యావరణ పరమైన ఆందోళనలను పెంచుతోంది. బీచ్లలోకి వాహనాలను తీసుకెళ్లడంపై కఠిన నిషేధం ఉన్నప్పటికీ, సదరు పర్యాటకులు తమ కారును ఏకంగా సముద్రపు నీటిలోకి పోనిచ్చారు. అలల తాకిడికి ఇసుక మెత్తబడటంతో కారు బరువుకు అందులో పూర్తిగా ఇరుక్కుపోయింది.
అధికారుల సాయం కోరకుండా..
కారు ఇసుకలో కూరుకుపోవడంతో అక్కడికి భారీగా జనం చేరుకున్నారు. ఈ సమయంలో పర్యాటకులు స్థానిక అధికారుల సహాయం కోరడానికి బదులుగా.. మరో కారుకు తాడు కట్టి ఫార్చూనర్ను బయటకు లాగేందుకు విఫల యత్నం చేశారు. చాలాసేపటి వరకు జరిగిన ఈ తతంగం అక్కడి బీచ్ సందర్శకులకు ఒక వినోదంగా మారింది. అనంతరం జేసీబీతో కారును అక్కడి నుంచి బయటకు తీశారు. ఇటీవల ఇలాంటి ఘటనలు అనేకం చోటు చేసుకున్నాయని, పర్యాటకులు నిబంధనలను ఉల్లంగించి బీచ్లో వాహనాలు నడుపుతున్నారని ఈ సందర్భంగా స్థానికులు తెలిపారు.
