‘దళపతి విజయ్ అనే నేను’.. డేట్ ఫిక్స్..

దిశ, వెబ్‌డెస్క్: తమిళనాడు రాజకీయాల్లో సరికొత్త అధ్యాయం మొదలైంది. అసెంబ్లీ ఎన్నికల్లో దళపతి విజయ్ నేతృత్వంలోని టీవీకే (TVK) 108 స్థానాలు గెలుచుకుని అతిపెద్ద పార్టీగా అవతరించడంతో, అందరి దృష్టి ఇప్పుడు ఆయన ప్రమాణ స్వీకార కార్యక్రమంపైనే ఉంది. దశాబ్దాల ద్రావిడ రాజకీయాల గుత్తాధిపత్యాన్ని చెరిపివేస్తూ విజయ్ సాధించిన ఈ విజయం అద్భుతమనే చెప్పాలి. వార్తా సంస్థల సమాచారం ప్రకారం, విజయ్ ప్రమాణ స్వీకారానికి సంబంధించిన కసరత్తులు ఇప్పటికే ప్రారంభమయ్యాయి. మే 5వ తేదీ మధ్యాహ్నం విజయ్ తన పార్టీ ఎమ్మెల్యేలతో కీలక సమావేశం నిర్వహించి, శాసనసభా పక్ష నేతగా ఎన్నికయ్యారు. విశ్వసనీయ వర్గాల సమాచారం ప్రకారం, మే 7వ తేదీన విజయ్ ముఖ్యమంత్రిగా ప్రమాణ స్వీకారం చేసే అవకాశం ఉన్నట్లు తెలుస్తోంది. చెన్నైలోని మెరీనా బీచ్ లేదా వైఎంసీఏ (YMCA) గ్రౌండ్స్‌లో భారీ బహిరంగ సభ మధ్య ఈ వేడుకను నిర్వహించాలని పార్టీ శ్రేణులు భావిస్తున్నాయి.

మెజారిటీ సమీకరణాలు..

తమిళనాడులో ప్రభుత్వం ఏర్పాటు చేయడానికి 118 స్థానాల మ్యాజిక్ ఫిగర్ అవసరం. విజయ్ పార్టీకి 108 స్థానాలు రాగా, మెజారిటీకి ఇంకా 10 సీట్లు తక్కువయ్యాయి. కాంగ్రెస్‌తో పాటు కొన్ని చిన్న పార్టీలు విజయ్ ప్రభుత్వానికి మద్దతు ఇచ్చే అవకాశం ఉందని రాజకీయ వర్గాల్లో చర్చ నడుస్తోంది. ప్రభుత్వం ఏర్పాటుకు అవసరమైన మద్దతును కూడగట్టేందుకు విజయ్ వ్యూహకర్తలతో కలిసి చర్చలు జరుపుతున్నారు. ఇతర పార్టీల ఎమ్మెల్యేల మద్దతు లేఖలను గవర్నర్‌కు సమర్పించిన వెంటనే ప్రమాణ స్వీకార తేదీని అధికారికంగా ప్రకటించనున్నారు. విజయ్ ఘనవిజయం సాధించడంతో చెన్నైలోని ఆయన నివాసం వద్ద అభిమానులు, పార్టీ కార్యకర్తలు భారీగా చేరుకుని వేడుకలు జరుపుకుంటున్నారు. "తమిళనాడుకు కొత్త ఆశ కిరణం దొరికింది" అంటూ నినాదాలు చేస్తున్నారు. విజయ్ తన సినిమా కెరీర్‌ను పక్కనపెట్టి రాజకీయాల్లోకి వచ్చిన మొదటి ప్రయత్నంలోనే ఇంతటి విజయాన్ని సాధించడం, అది కూడా ఎంకే స్టాలిన్ వంటి హేమాహేమీలను ఎదుర్కొని అతిపెద్ద పార్టీగా నిలవడం భారత రాజకీయ చరిత్రలోనే ఒక అరుదైన ఘట్టమని రాజకీయ విశ్లేషకులు అభిప్రాయపడుతున్నారు.