అడ్డంకులు ఎన్ని ఎదురైనా.. గమ్యాన్ని ముద్దాడిన ‘దళపతి’

దిశ, వెబ్‌డెస్క్: తమిళనాడు రాజకీయ యవనికపై ఒక నూతన శకం ఆరంభం కాబోతోంది. ఎన్నో ఒడిదుడుకులు, మరెన్నో ఆటుపోట్లను ఎదుర్కొని, పట్టువదలని విక్రమార్కుడిలా పోరాడిన ‘తలపతి’ విజయ్ ఎట్టకేలకు విజయాన్ని ముద్దాడారు. తమిళగ వెట్రి కళగం (TVK) పార్టీని స్థాపించిన నాటి నుండి నేటి వరకు ఆయన సాగించిన ప్రయాణం అత్యంత కఠినంగా సాగింది. అన్ని అడ్డంకులను అధిగమించి రేపు (ఆదివారం) ఆయన తమిళనాడు ముఖ్యమంత్రిగా ప్రమాణ స్వీకారం చేయబోతున్నారు.

అడుగడుగునా సవాళ్లు..

విజయ్ రాజకీయ రంగ ప్రవేశం అంత సులభంగా సాగలేదు. ఒకవైపు దశాబ్దాల చరిత్ర కలిగిన ద్రావిడ దిగ్గజ పార్టీలు, మరోవైపు జాతీయ పార్టీల మధ్య తన ఉనికిని చాటుకోవడం ఆయనకు పెద్ద సవాలుగా మారింది. పార్టీ ప్రకటన నాటి నుండి ఈ ఎన్నికల ఫలితాల వరకు ఆయన ప్రతి అడుగులోనూ విమర్శలు, రాజకీయ ఎత్తుగడలు ఎదురయ్యాయి. అయితే, వాటన్నింటినీ తనదైన శైలిలో ఎదుర్కొంటూ, ప్రజల మద్దతును కూడగట్టడంలో విజయ్ సఫలీకృతులయ్యారు.

ఎట్టకేలకు దక్కిన గ్రీన్ సిగ్నల్..

ప్రభుత్వ ఏర్పాటు విషయంలో గత కొన్ని రోజులుగా నెలకొన్న ఉత్కంఠకు గవర్నర్ రాజేంద్ర విశ్వనాథ్ అర్లేకర్ గ్రీన్ సిగ్నల్ ఇవ్వడంతో తెరపడింది. కాంగ్రెస్, లెఫ్ట్, వీసీకే, ఐయూఎమ్‌ఎల్ పార్టీల మద్దతుతో విజయ్ బలం 120కి చేరడంతో, సంకీర్ణ ప్రభుత్వ ఏర్పాటుకు మార్గం సుగమమైంది. దీంతో రేపు ఆదివారం మధ్యాహ్నం 3 గంటలకు చెన్నైలోని జవహర్ లాల్ నెహ్రూ ఇండోర్ స్టేడియంలో విజయ్ ముఖ్యమంత్రిగా ప్రమాణ స్వీకారం చేయనున్నారు. ఈ చారిత్రక ఘట్టాన్ని వీక్షించేందుకు తమిళనాడు నలుమూలల నుండి అభిమానులు, కార్యకర్తలు చెన్నైకి తరలివస్తున్నారు. ఇప్పటికే రాష్ట్రవ్యాప్తంగా బాణాసంచా పేల్చుతూ విజయ్ అభిమానులు సంబురాలు జరుపుకుంటున్నారు. ఎన్నో ఏళ్ల నిరీక్షణ, కఠిన శ్రమ తర్వాత విజయ్ సాధించిన ఈ విజయం తమిళ రాజకీయాల్లో ఒక పెద్ద మలుపుగా నిలవనుంది.