Free Meal : పారిశుద్ధ్య కార్మికులకు 'ఉచిత భోజన పథకం' ప్రారంభం

దిశ, డైనమిక్ బ్యూరో: తమిళనాడులోని పట్టణ స్థానిక సంస్థల్లో పనిచేస్తున్న పారిశుద్ధ్య కార్మికుల కోసం రాష్ట్ర ప్రభుత్వం ప్రతిష్టాత్మకంగా అమలు చేస్తున్న 'ఉచిత భోజన పథకాన్ని' ముఖ్యమంత్రి ఎం.కె. స్టాలిన్ సోమవారం విస్తరించారు. తిరువళ్లూరు జిల్లా పొలివాక్కంలో జరిగిన కార్యక్రమంలో ఆయన ఈ పథకాన్ని లాంఛనంగా ప్రారంభించారు. దీనివల్ల రాష్ట్ర వ్యాప్తంగా మరో లక్ష మంది కార్మికులకు ప్రయోజనం చేకూరనుంది.

తంజావూరు జిల్లాలో 2,677 మందికి లబ్ధి..

ఈ పథకం విస్తరణతో తంజావూరు జిల్లాలో మొత్తం 2,677 మంది కార్మికులు ప్రయోజనం పొందనున్నారు. జిల్లావ్యాప్తంగా నవంబర్ 9 నుంచి వీరికి ప్రతిరోజూ ఉదయం అల్పాహారం అందించనున్నారు. గత ఏడాది కేవలం చెన్నై కార్పొరేషన్ (GCC) పరిధిలోని 29,455 మంది కార్మికులకు మాత్రమే పరిమితమైన ఈ పథకాన్ని, ఇప్పుడు రాష్ట్ర వ్యాప్తంగా ఉన్న అన్ని పట్టణ స్థానిక సంస్థలకు వర్తింపజేశారు. 24 మున్సిపల్ కార్పొరేషన్లు, 48,768 మంది కార్మికులు, 145 మున్సిపాలిటీల్లో 29,556 మంది, 479 టౌన్ పంచాయతీల్లో 21,910 మంది కార్మికులు ఉన్నట్లు అధికారులు తెలిపారు.

కార్మికుల సంక్షేమమే ధ్యేయం..

ఆగస్టు 14, 2025 న జరిగిన కేబినెట్ సమావేశంలో తీసుకున్న నిర్ణయం మేరకు ఈ విస్తరణ చేపట్టారు. తెల్లవారుజామునే విధులకు హాజరయ్యే కార్మికులకు పోషకాహార భద్రత కల్పించడం, వారి రోజువారీ ఖర్చులను తగ్గించడం ఈ పథకం యొక్క ప్రధాన ఉద్దేశం. ఈ సందర్భంగా సీఎం స్టాలిన్ సోషల్ మీడియాలో స్పందిస్తూ.. "పారిశుద్ధ్య కార్మికుల జీవన ప్రమాణాలను మెరుగుపరచడానికి మా ప్రభుత్వం కట్టుబడి ఉంది. ఇప్పటికే గృహ వసతి, రుణ సదుపాయాలు, బీమా, వారి పిల్లల విద్య కోసం పలు పథకాలు అమలు చేస్తున్నాం. భవిష్యత్తులో మరిన్ని సంక్షేమ కార్యక్రమాలు చేపడతాం’ అని పేర్కొన్నారు.