అస్సాంలో కుప్పకూలిన యుద్ధ విమానం.. కొండ ప్రాంతంలో భారీ పేలుడు శబ్దం!

దిశ, వెబ్‌డెస్క్: అస్సాంలోని కర్బీ ఆంగ్లాంగ్ జిల్లా పరిధిలోని మారుమూల కొండ ప్రాంతంలో గురువారం సాయంత్రం భారత వాయుసేనకు చెందిన 'సుఖోయ్-30' యుద్ధ విమానం(Sukhoi Su-30 MKI Fighter Jet) కుప్పకూలినట్లు అనుమానిస్తున్నారు. ఈ ఘటన స్థానిక ప్రజల్లో తీవ్ర భయాందోళనలకు గురిచేసింది. ప్రాథమిక సమాచారం ప్రకారం.. జోర్హాట్ ఎయిర్‌బేస్ నుండి బయలుదేరిన ఈ యుద్ధ విమానం సాయంత్రం 7 గంటల సమయంలో రాడార్‌తో సంబంధాలు కోల్పోయింది. చొకిహోలా పరిధిలోని నిలిప్ బ్లాక్ సమీపంలోని కొండ ప్రాంతంలో ఈ ప్రమాదం జరిగి ఉండవచ్చని భావిస్తున్నారు.

భారీ శబ్దం.. దట్టమైన పొగ

ప్రమాద సమయంలో కొండల వైపు నుండి ఒక్కసారిగా భారీ పేలుడు శబ్దం వినిపించిందని స్థానిక గ్రామస్తులు తెలిపారు. చీకటి పడిన తర్వాత సంభవించిన ఈ పేలుడు ధాటికి ఇళ్లలో ఉన్న వారు భయంతో బయటకు పరుగులు తీశారు. శబ్దం వచ్చిన దిశ నుండి దట్టమైన పొగలు అలుముకున్నాయని కొందరు ప్రత్యక్ష సాక్షులు పేర్కొన్నారు. అయితే, ప్రమాదం జరిగిన ప్రాంతం దట్టమైన అడవులు, ఎత్తైన కొండలతో కూడి ఉండటంతో అటువైపు వెళ్లడం ప్రజలకు కష్టసాధ్యంగా మారింది.

గాలింపు చర్యలు ప్రారంభం

ఈ ఘటనపై రక్షణ శాఖ నుండి ఇంకా అధికారిక ప్రకటన వెలువడనప్పటికీ, విమానం ఆచూకీ కోసం గాలింపు చర్యలు మొదలయ్యాయి. వాస్తవాలను తెలుసుకోవడానికి మరియు విమానాన్ని గుర్తించడానికి భారత వాయుసేన (IAF) బృందం రంగంలోకి దిగింది. ప్రమాద స్థలం జనవాసాలకు దూరంగా ఉండటం, భౌగోళిక పరిస్థితులు అనుకూలించకపోవడంతో సహాయక చర్యలకు ఆటంకం కలుగుతోంది. విమానంలోని పైలట్ల పరిస్థితి ఎలా ఉంది? ఈ ప్రమాదానికి గల కారణాలేంటి? అన్న విషయాలపై స్పష్టత రావాల్సి ఉంది.