చివరి క్షణంలో ఆగిపోయిన స్పేస్‌ఎక్స్ స్టార్షిప్ ప్రయోగం

దిశ, వెబ్ డెస్క్: ప్రపంచ అంతరిక్ష పరిశోధనా రంగంలో సరికొత్త సంచలనాలకు కేంద్రమైన స్పేస్‌ఎక్స్ (SpaceX) సంస్థ కొత్త ప్రయోగంలో అనూహ్య పరిణామం చోటుచేసుకుంది. ప్రపంచంలోనే అత్యంత భారీ, అత్యంత శక్తివంతమైన రాకెట్‌గా పేరొందిన 'స్టార్షిప్' (Starship) 13వ టెస్ట్ ఫ్లైట్ (13th Test Flight) ప్రయోగం లాంచ్‌కు కొన్ని సెకన్ల ముందు ఎవరూ ఊహించని విధంగా నిలిచిపోయింది. టెక్సాస్‌లోని బోకా చికా లాంచ్ ప్యాడ్ నుండి కౌంట్‌డౌన్ చకచకా సాగుతున్న తరుణంలో, రాకెట్ ఇంజిన్లు మండటానికి కొన్ని సెకన్ల ముందే అందులోని ఆటోమేటిక్ భద్రతా వ్యవస్థ (Automatic Safety System) లోపాన్ని గుర్తించి ప్రయోగాన్ని స్వయంచాలకంగా నిలిపివేసింది.

బూస్టర్, స్పేస్‌క్రాఫ్ట్‌లోని అంతర్గత సాంకేతిక కారణాల (Technical Glitch) వల్లే ఈ అంతరాయం ఏర్పడినట్లు తెలుస్తోంది. ఎలాంటి రిస్క్ తీసుకోకూడదనే ఉద్దేశంతోనే కంప్యూటర్ వ్యవస్థ ప్రయోగాన్ని హోల్డ్‌లో పెట్టిందని స్పేస్‌ఎక్స్ వర్గాలు వెల్లడించాయి. ఈ ప్రయోగం వాయిదా పడటంతో రాకెట్ లోపాలను సరిదిద్ది, తదుపరి ప్రయోగ తేదీని, సమయాన్ని త్వరలోనే అధికారికంగా ప్రకటిస్తామని స్పేస్‌ఎక్స్ స్పష్టం చేసింది. చంద్రుడు, అంగారక గ్రహాలపైకి మానవుడిని తీసుకెళ్లే లక్ష్యంతో ఈ స్టార్షిప్ రాకెట్‌ను ఎలోన్ మస్క్ నేతృత్వంలోని స్పేస్‌ఎక్స్ అభివృద్ధి చేస్తోన్న సంగతి తెలిసిందే.