కర్ణాటకలో ఘోర రోడ్డు ప్రమాదం.. ఆరుగురు డెలివరీ బాయ్స్ దుర్మరణం

దిశ, డైనమిక్ బ్యూరో: కర్ణాటక రాష్ట్రం ఉత్తర కన్నడ జిల్లా ఎల్లాపుర తాలూకా అరాబైల్ ఘాట్ సమీపంలో బుధవారం అర్ధరాత్రి దాటిన తర్వాత ఘోర రోడ్డు ప్రమాదం సంభవించింది. ఎదురుగా వస్తున్న లారీని ప్రయాణికుల వాహనం (MUV/జీపు) ఢీకొట్టిన ఈ ఘటనలో ఆరుగురు యువకులు అక్కడికక్కడే ప్రాణాలు కోల్పోగా, మరో ముగ్గురు తీవ్రంగా గాయపడ్డారు. ప్రాణాలు కోల్పోయిన వారంతా ధార్వాడ్‌కు చెందిన నిరుపేద యువకులు. వీరంతా కుటుంబ పోషణ కోసం హుబ్లీ-ధార్వాడ్‌లో ఫుడ్ డెలివరీ యాప్/ఈ-కామర్స్ సంస్థల్లో పార్ట్‌టైమ్ డెలివరీ బాయ్స్‌గా పనిచేస్తున్నట్లు పోలీసులు గుర్తించారు. బసవరాజ్ (48), అభిషేక్ ఈశ్వర్ (28), అక్షయ్ (26), అభిషేక్ (26), మంజునాథ్ చులకి (32)తో పాటు వాహన డ్రైవర్ సంజీవ్ అంగడి (33) మరణించిన వారిలో ఉన్నారు.

ప్రమాదం జరిగిందిలా..

బుధవారం రాత్రి 11 గంటల ప్రాంతంలో వీరంతా ధార్వాడ్ నుంచి ధర్మస్థల తదితర పుణ్యక్షేత్రాల దర్శనానికి బయలుదేరారు. ఎల్లాపుర సమీపంలోని బల్గార్ వద్దకు రాగానే వీరు ప్రయాణిస్తున్న వాహనం ఎదురుగా వస్తున్న లారీ కిందకు వేగంగా దూసుకుపోయింది. ఢీకొన్న వేగానికి వాహనం ముందు భాగం పూర్తిగా నుజ్జునుజ్జు అయింది. పోలీసులు, రెస్క్యూ సిబ్బంది వాహనంలో ఇరుక్కుపోయిన వారిని అతికష్టం మీద వెలికితీశారు. గాయపడిన ముగ్గురిని స్థానిక ఆస్పత్రికి తరలించి అత్యవసర చికిత్స అందిస్తున్నారు. అతివేగం, అర్ధరాత్రి దట్టమైన చీకటి లేదా డ్రైవర్ నిద్రమత్తులో ఉండటమే ఈ ఘోర ప్రమాదానికి కారణమని పోలీసులు ప్రాథమికంగా భావిస్తున్నారు. ఈ ఘటనపై ఎల్లాపుర పోలీసులు కేసు నమోదు చేసి దర్యాప్తు చేస్తున్నారు.