విడుదలకు సిద్ధమైన హారర్ థ్రిల్లర్ ‘అగధ’ .. సరికొత్త భయాన్ని చూడబోతున్నారంటూ మేకర్స్ పోస్ట్

దిశ, సినిమా: మా ఊరి పొలిమేర’ సిరీస్‌తో ప్రేక్షకులను ఎంతగానో భయపెట్టి, నటిగా మంచి క్రేజ్ సంపాదించుకున్న కామాక్షి భాస్కర్ల ఇప్పుడు మరో విభిన్నమైన హారర్ సినిమాతో ప్రేక్షకుల ముందుకు రాబోతున్నారు. ఆమె ప్రధాన పాత్రలో నటించిన లేటెస్ట్ మూవీ ‘అగధ’ . టాలీవుడ్ సీనియర్ డైరెక్టర్ ఎమ్.ఎస్. రాజు దర్శకత్వంలో తెరకెక్కుతున్న ఈ సినిమా.. ఆత్మలు, చేతబడులు, మార్మిక శక్తుల నేపథ్యంలో సాగే ఒక పక్కా హారర్ థ్రిల్లర్ కావడం విశేషం. ఈ క్రేజీ ప్రాజెక్ట్‌ను శ్రీ ఆది వరాహ బ్యానర్‌పై నిర్మాత కాశీ విశాలాక్షి బలుసు ఎంతో ప్రతిష్టాత్మకంగా నిర్మిస్తున్నారు. ఇందులో కామాక్షి భాస్కర్లతో పాటు శ్రవణ్ రెడ్డి, ఉల్కా గుప్తా, జోవికా విజయ్ కుమార్, సిజ్జు, రోషన్, శ్రేయరాణి రెడ్డి వంటి నటీనటులు కీలక పాత్రల్లో కనిపించబోతున్నారు. ఈ చిత్రానికి రాకేష్ వెంకటాపురం అద్భుతమైన నేపథ్య సంగీతాన్ని అందిస్తున్నారు.

‘ఇప్పటికే షూటింగ్ మొత్తం పూర్తి చేసుకున్న ఈ సినిమా.. థియేటర్లలోకి వచ్చేందుకు సిద్ధమైంది. తాజాగా, ఈ విషయాన్ని మూవీ మేకర్స్ అధికారికంగా ప్రకటించడంతో పాటుగా సోషల్ మీడియాలో సరికొత్త పోస్టర్‌ను రిలీజ్ చేసింది. ఇక విడుదల చేసిన పోస్టర్‌లో కామాక్షి లుక్ చూస్తే ఎవరికైనా ఒళ్లు గగుర్పొడవడం ఖాయం. ముఖమంతా పసుపు, కుంకుమ పూసుకుని ఆమె ఎంతో భయంకరంగా కనిపిస్తున్నారు. ఈ సినిమాను ఆగస్టు 14న తెలుగుతో పాటు తమిళం, హిందీ, కన్నడ, మలయాళ భాషల్లో గ్రాండ్‌గా రిలీజ్ చేయబోతున్నట్లు వెల్లడించారు. ఇక ఈ పోస్ట్‌కు.. "ఇంతకు ముందెన్నడూ చూడని సరికొత్త భయాన్ని చూడబోతున్నారు.. థియేటర్లలో ఒక మైండ్ బ్లోయింగ్ హారర్ ఎక్స్‌పీరియన్స్ కోసం రెడీగా ఉండండి" అంటూ మేకర్స్ సినిమాపై హైప్ పెంచేలా క్యాప్షన్ పెట్టారు.