Indian students: ఐదేళ్లలో తొలిసారిగా.. ఆ దేశాలకు భారీగా తగ్గిన భారత విద్యార్థులు
దిశ, నేషనల్ బ్యూరో: విదేశాలకు వెళ్లే భారతీయ విద్యార్థుల గణనీయంగా తగ్గింది. ఐదేళ్లలో తొలిసారిగా విదేశాలకు వెళ్లే భారతీయ విద్యార్థుల సంఖ్య తగ్గినట్లు తెలుస్తోంది. ముఖ్యంగా విద్యార్థులు ప్రధానంగా వెళ్లే కెనడా(Canada), అమెరికా(USA), యూకే(UK)ల్లో వీసా తిరస్కరణలు కూడా కారణం కావచ్చని విశ్లేషకులు భావిస్తున్నారు. 2024లో ఈ మూడు దేశాల నుంచి భారతీయ విద్యార్థులకు లభించే స్టూడెంట్‌ వీసాల్లో 25శాతం తగ్గాయి. కాగా, అమెరికాకు వెళ్లే విద్యర్థుల సంఖ్య 34 శాతం పడిపోయింది. దీంతో 2024లో అంతకు ముందు ఏడాదితో పోలిస్తే ఎఫ్‌1 వీసాల్లో 1,31,000 నుంచి 86,000కు తగ్గుదల నమోదైంది. కెనడాకు వెళ్లేవారి సంఖ్యలో 32శాతం తగ్గింది. ఇది 2.78లక్షల నుంచి 1.89 లక్షలకు తగ్గినట్లు ఇమిగ్రేషన్‌, రెఫ్యూజీస్‌ అండ్‌ సిటిజన్‌షిప్‌ కెనడా సంస్థ వెల్లడించింది. యూకేకు వెళ్లే వారి సంఖ్యలో 26శాతం తగ్గుదల కనిపించింది. అంతకు ముందు ఏడాది 1,20,000 విద్యార్థి వీసాలు ఉండగా.. యూకే హోమ్‌ ఆఫీస్‌ లెక్కల ప్రకారం 2024 ఆర్థిక సంవత్సరంలో 88,732కు తగ్గాయి.
కారణాలేంటీ..?
ముఖ్యంగా కెనడా, యూకే దేశాలు విద్యార్థి వీసాలపై పరిమితులు విధించడం ఈ పరిస్థితికి కారణంగా నిలిచాయి. కెనడా - భారత్ మధ్య ఉద్రిక్తతలు ఏర్పడటంతో.. ఆ దేశంలోని భారతీయ విద్యార్థులపై పలు ఆంక్షలు విధించింది. స్టూడెంట్‌ డైరెక్ట్‌ స్ట్రీమ్‌ ప్రోగ్రామ్‌ను వేగవంతం చేసింది. దీంతోపాటు తమ దేశంలో తాత్కాలికంగా నివశించే విదేశీయు సంఖ్యను 2026 నాటికి 5 శాతానికి తగ్గించాలన్న నిర్ణయం ప్రభావం కూడా ఉంది. యూకే కూడా విదేశీ విద్యార్థులు వారిపై ఆధారపడిన వారిని తీసుకురాకుండా నిబంధనలు విధించింది. ఈ కారణంతో ఆ దేశానికి వీసాకు దరఖాస్తు చేసేవారి సంఖ్య తగ్గింది. గత పదేళ్లలో ఈ మూడు దేశాల్లో భారతీయ విద్యార్థుల సంఖ్య అత్యంత వేగంగా పెరిగింది. 2015 నుంచి 2023 మధ్య కెనడా వెళ్లే భారత విద్యార్థుల సంఖ్య 31,920 నుంచి 2,78,160కు చేరుకొంది. యూకేకు వెళ్లేవారి సంఖ్య 10, 418 నుంచి 1,19,738 చేరుకొంది. యూఎస్ఏకు 2015లో 74,831 మంది ఎఫ్‌1 వీసాపై వెళ్లగా.. 2023లో అది 1,30,730గా ఉంది.
