బెయిల్ పిటిషన్ల విచారణపై సుప్రీంకోర్టు సంచలన నిర్ణయం.. ఇక ఆటోమేటిక్ లిస్టింగ్
హైకోర్టుల్లో బెయిల్ పిటిషన్లను వేగంగా పరిష్కరించాలని సుప్రీంకోర్టు ఆదేశించింది. వాయిదాలు ఇవ్వొద్దని, ఆటోమేటిక్ లిస్టింగ్ అమలు చేయాలని స్పష్టం చేసింది.
దిశ, డైనమిక్ బ్యూరో: దేశవ్యాప్తంగా వివిధ హైకోర్టుల్లో పెండింగ్లో ఉన్న బెయిల్ పిటిషన్లను త్వరితగతిన పరిష్కరించేలా చర్యలు తీసుకోవాలని సుప్రీంకోర్టు ఆదేశించింది. బెయిల్ కేసుల పరిష్కారానికి గడువులు నిర్ణయించాలని కేంద్ర, రాష్ట్ర ప్రభుత్వాలకు సాధారణంగా వాయిదాలు మంజూరు చేయకూడదని సోమవారం స్పష్టం చేసింది. భారత ప్రధాన న్యాయమూర్తి (CJI) జస్టిస్ సూర్యకాంత్, జస్టిస్ జాయ్మాల్యా బాగ్చీలతో కూడిన ధర్మాసనం ఈ తీర్పునిస్తూ.. బాధితుల హక్కులకు భంగం కలగకుండా బెయిల్ దరఖాస్తులను సకాలంలో పరిష్కరించేందుకు హైకోర్టులు, దర్యాప్తు సంస్థలు సమన్వయంతో వ్యవహరించాలని పేర్కొంది. ప్రాథమిక హక్కులను పరిరక్షించడం న్యాయస్థానం యొక్క పవిత్రమైన బాధ్యత అని గుర్తు చేస్తూ ప్రభుత్వాలకు ఇష్టానుసారంగా వాయిదాలు ఇచ్చే పద్ధతిని మానుకోవాలని సూచించింది.
ఆటోమేటిక్ లిస్టింగ్:
బెయిల్ అంశాలను వారానికొకసారి లేదా పక్షం రోజులకు ఒకసారి షెడ్యూల్ చేసేలా క్రమబద్ధమైన లిస్టింగ్ చేయాలని హైకోర్టులను ధర్మాసనం ఆదేశించింది. ప్రతి రెండు వారాలకు ఒకసారి ఆటోమేటిక్ లిస్టింగ్ చేసే అవకాశాన్ని పరిశీలించాలని తెలిపింది. కొత్తగా దాఖలైన బెయిల్ పిటిషన్లను ప్రత్యామ్నాయ రోజుల్లో లేదా వారం లోపు లిస్ట్ చేయాలని ఆదేశించింది. విచారణలో జాప్యాన్ని తగ్గించేందుకు సుప్రీంకోర్టు మరికొన్ని కీలక మార్గదర్శకాలను జారీ చేసింది. మొదటి విచారణకు ముందే స్టేటస్ రిపోర్టులను దాఖలు చేయాలని, బెయిల్ పిటిషన్ల ముందస్తు కాపీలను అడ్వకేట్ జనరల్ కార్యాలయానికి లేదా నిర్ణీత రాష్ట్ర సంస్థకు అందించాలని పేర్కొంది. అడ్మిషన్ దశలో నోటీసులు జారీ చేసే ప్రస్తుత పద్ధతిని నిలిపివేయాలని, విచారణకు రాని బెయిల్ దరఖాస్తులను ఆటోమేటిక్గా తిరిగి లిస్ట్ చేయాలని ఆదేశించింది. పంజాబ్ మరియు హర్యానా హైకోర్టులో కేసుల పెండింగ్పై దాఖలైన విన్నపాన్ని విచారిస్తున్న సందర్భంగా కోర్టు ఈ వ్యాఖ్యలు చేసింది.
