మత్స్యకారుల వలకు చిక్కిన వింత చేప.. అరిష్టమంటూ ఆందోళన ?

దిశ, వెబ్‌డెస్క్: తమిళనాడు సముద్ర తీరంలో మత్స్యకారుల వలలో చిక్కిన ఒక అసాధారణ, విచిత్రమైన చేప స్థానికంగా సంచలనం సృష్టించింది. సుమారు 30 అడుగుల పొడవున్న ఈ చేపను 'ఓర్ ఫిష్' అని పిలుస్తారు. సముద్ర గర్భంలో లోతైన ప్రాంతాల్లో నివసించే ఈ జీవి ఉపరితలంపై కనిపించడం చాలా అరుదు. అయితే.. కొన్ని దేశాల్లో, ముఖ్యంగా జపాన్, ఆగ్నేయాసియా దేశాల్లో.. ఈ చేప కనిపించడం భూకంపాలు, సునామీలు వంటి ప్రకృతి విపత్తులకు సంకేతంగా పరిగణిస్తారు. ఈ నెల ప్రారంభంలో ఈ 'ప్రళయ చేప' వలలో చిక్కిందన్న వార్త స్థానికంగా, సోషల్ మీడియాలో తీవ్ర ఆందోళనను రేకెత్తించింది.

శాస్త్రీయంగా రిగాలెకస్ గ్లెస్నే (Regalecus Glesne) అని పిలవబడే ఓర్ ఫిష్.. సముద్రంలో నివసించే అతిపెద్ద ఎముకల చేపల జాతుల్లో ఒకటి. ఇది సాధారణంగా సముద్రంలో 200 నుంచి 1,000 మీటర్ల లోతులో ఉంటుంది. వెండి రంగు శరీరం, తలపై ఎరుపు రంగు కిరీటం లాంటి నిర్మాణం దీనికి ప్రత్యేకమైన రూపాన్ని ఇస్తాయి. దీని అరుదైన దర్శనం, విచిత్రమైన ఆకృతి కారణంగా.. ఆసియా సంస్కృతుల్లో, ముఖ్యంగా జపాన్‌లో, దీనిని 'డూమ్స్‌డే ఫిష్' లేదా 'ప్రళయ చేప'గా పరిగణిస్తారు. ఈ చేప కనిపిస్తే పెద్ద విపత్తు సంభవించవచ్చని స్థానిక నమ్మకాలు సూచిస్తాయి.

తమిళనాడు తీరంలో ఈ చేప పట్టుబడటంతో స్థానిక మత్స్యకారులు, ప్రజలు సోషల్ మీడియా వినియోగదారులు ఆందోళన వ్యక్తం చేశారు. ఈ చేపకు సంబంధించిన వీడియో జూన్ మొదటి వారంలో సోషల్ మీడియాలో వైరల్‌గా మారింది. కొందరు నెటిజన్లు ఈ చేప కనిపించడం ప్రపంచ వినాశనానికి సంకేతమని, మరికొందరు ఇటీవలి ప్రకృతి ఉద్రిక్తతలకు ఇదే కారణమని ఊహాగానాలు చేశారు.

అయితే.. సముద్ర జీవశాస్త్ర నిపుణులు ఈ భయాలను తోసిపుచ్చారు. ఓర్ ఫిష్ సముద్ర లోతుల్లో నివసించే జీవి అని, గాయాలు లేదా సముద్ర ప్రవాహాల మార్పుల వల్ల మాత్రమే ఉపరితలంపై కనిపిస్తుందని వారు వివరించారు. ఇండియన్ నేషనల్ సెంటర్ ఫర్ ఓషన్ ఇన్ఫర్మేషన్‌కు చెందిన డాక్టర్ ఎన్. రాఘవేంద్ర ప్రకారం.. "ఓర్ ఫిష్ కనిపించడం.. భూకంపాలు లేదా ఇతర విపత్తుల మధ్య ఎలాంటి శాస్త్రీయ సంబంధం లేదు." 2019లో పసిఫిక్ మహాసముద్రంలో నిర్వహించిన ఒక అధ్యయనం కూడా ఈ నమ్మకాలను ఖండించింది. ఈ అరుదైన చేప దర్శనం స్థానికుల్లో ఆందోళన కలిగించినప్పటికీ, శాస్త్రవేత్తలు దీనికి విపత్తులతో సంబంధం లేదని, ఆందోళనకు ఆధారం లేదని స్పష్టం చేస్తున్నారు.