Ram Temple: అయోధ్య మందిరంలో విరాళాల చోరీ కేసును రాజకీయం చేయొద్దు

దిశ, నేషనల్ బ్యూరో: అయోధ్య రామమందిర విరాళాల దుర్వినియోగం ఆరోపణల కేసును రాజకీయ రంగు పులమొద్దని సుప్రీంకోర్టు స్పష్టం చేసింది. ఈ వ్యవహారం కేవలం ఒక సాధారణ క్రిమినల్ కేసు మాత్రమేనని, సరైన దర్యాప్తు జరిగేలా చూడటమే కోర్టు బాధ్యత అని వ్యాఖ్యానించింది. జస్టిస్ సూర్యకాంత్ నేతృత్వంలోని ధర్మాసనం ఈ కేసుకు సంబంధించి దాఖలైన పిటిషన్లపై విచారణ సందర్భంగా, కోర్టులు రాజకీయాలకు వేదికలు కావని, రాజకీయాల్లోకి కోర్టులను లాగొద్దని స్పష్టం చేసింది. ఈ వ్యవహారంలో చట్టప్రకారం సరైన దర్యాప్తు జరిగేలా చూడటమే న్యాయస్థానం పాత్ర అని తేల్చి చెప్పింది. అయితే, ఇప్పటికే ఉత్తరప్రదేశ్ ప్రభుత్వం ప్రత్యేక దర్యాప్తు బృందం (సిట్)ను ఏర్పాటు చేసి విచారణ కొనసాగిస్తోందని సొలిసిటర్ జనరల్ తుషార్ మెహతా కోర్టుకు తెలిపారు. సిట్ దర్యాప్తు పురోగతిపై రాష్ట్ర ప్రభుత్వం జూలై 27న సుప్రీంకోర్టుకు నివేదిక సమర్పించనుంది.

సిట్ మధ్యంతర నివేదిక ఆధారంగా ఇప్పటికే ఎఫ్ఐఆర్ నమోదు చేసి, ఎనిమిది మంది నిందితులను అరెస్టు చేయడంతో పాటు, ఆలయ విరాళాల నుంచి అక్రమంగా తరలించినట్లు ఆరోపిస్తున్న సుమారు రూ.80 లక్షలను స్వాధీనం చేసుకున్నట్లు దర్యాప్తు సంస్థలు వెల్లడించాయి. ఈ పరిణామాల నేపథ్యంలో ట్రస్ట్ మాజీ ప్రధాన కార్యదర్శి చంపత్ రాయ్, మాజీ ట్రస్టీ అనిల్ మిశ్రా తమ పదవులకు రాజీనామా చేశారు. ప్రస్తుతం జరుగుతున్న రాష్ట్ర స్థాయి సిట్ దర్యాప్తు సమగ్రతను ప్రశ్నిస్తూ.. ఈ కుంభకోణంపై కోర్టు పర్యవేక్షణలో సీబీఐ విచారణ జరిపించాలని, అలాగే ట్రస్ట్ ఆర్థిక వ్యవహారాలపై కాగ్ ఆడిట్, ఫోరెన్సిక్ ఆడిట్ నిర్వహించాలని సుప్రీంకోర్టులో పలు పిటిషన్లు దాఖలయ్యాయి. ఆలయ విరాళాల సేకరణ, లెక్కింపు విధానాలలో పెద్ద ఎత్తున సంస్కరణలు అవసరమని భావిస్తున్న సిట్, తన తుది నివేదికను సమర్పించడానికి ఆర్థిక రికార్డుల పరిశీలన కోసం మరికొంత సమయం కోరింది. ఈ నేపథ్యంలో, సిట్ నివేదికలోని అంశాలపై చర్చించి, భవిష్యత్తు దిద్దుబాటు చర్యలను తీసుకునేందుకు ట్రస్ట్ సభ్యులు జూలై 22న అయోధ్యలో అత్యవసరంగా సమావేశం కానున్నారు. అనంతరం, జూలై 27న జరగబోయే తదుపరి విచారణలో ఉత్తరప్రదేశ్ ప్రభుత్వం ఈ దర్యాప్తు పురోగతిని అత్యున్నత న్యాయస్థానానికి వివరించనుంది. ఈ నివేదిక ఆధారంగానే కోర్టు తదుపరి కీలక ఆదేశాలు ఇచ్చే అవకాశం ఉంది.