Rahul gandhi: ఆ నిర్ణయాన్ని స్వాగతిస్తున్నాం.. కాంగ్రెస్ ఎంపీ రాహుల్ గాంధీ

దిశ, నేషనల్ బ్యూరో: 2009, 2024 మధ్య హర్యానా (Haryana), మహారాష్ట్ర (Maharashtra) లో జరిగిన ఎన్నికల డేటాను పంచుకోవాలనే ఎన్నికల కమిషన్ (Election commission) నిర్ణయాన్ని లోక్‌సభ ప్రతిపక్ష నేత, కాంగ్రెస్ ఎంపీ రాహుల్ గాంధీ (Rahul gandhi) స్వాగతించారు. ఇది మంచి పరిణామమని అయితే ఈ డేటాను రాజకీయ పార్టీలకు ఏ తేదీన అందజేస్తారో చెప్పగలరా అని ప్రశ్నించారు. ఈ మేరకు రాహుల్ ఎక్స్‌లో పోస్ట్ చేశారు. ‘ఎన్నికల సంఘం ఓటర్ లిస్ట్ అందజేయడం మంచిదే. అయితే ఈ డేటా డిజిటల్, మెషిన్-రీడబుల్ ఫార్మాట్‌లో ఎప్పుడు అందజేస్తారో ఈసీ ప్రకటించగలదా?’ అని పేర్కొన్నారు. హర్యానా, మహారాష్ట్ర ఓటర్ల జాబితాను పొలిటికల్ పార్టీలకు ఇవ్వాలని ఎన్నికల సంఘం నిర్ణయించినట్టు తెలిపే ఓ నివేదికను సైతం రాహుల్ పోస్ట్ చేశారు. కాగా, 2024 మహారాష్ట్ర అసెంబ్లీ ఎన్నికల్లో రిగ్గింగ్ జరిగిందని రాహుల్ గతంలో ఆరోపించిన విషయం తెలిసిందే.