బంగ్లాదేశ్లో మైనారిటీల రక్షణ ముఖ్యం: ఎంపీ అసదుద్దీన్ ఒవైసీ
బంగ్లాదేశ్లో దీపు చంద్ర దాస్, అమృత్ మండల్పై జరిగిన దాడులను ఎంపీ అసదుద్దీన్ ఒవైసీ తీవ్రంగా ఖండించారు.
దిశ, వెబ్డెస్క్: బంగ్లాదేశ్లో దీపు చంద్ర దాస్, అమృత్ మండల్పై జరిగిన దాడులను ఎంపీ అసదుద్దీన్ ఒవైసీ (MP Asaduddin Owaisi) తీవ్రంగా ఖండించారు. భారత్-బంగ్లాదేశ్ మధ్య సంబంధాలు బలంగా ఉండాలని కోరుకుంటూ, మైనారిటీల రక్షణ కోసం భారత ప్రభుత్వం తీసుకునే చర్యలకు తాము మద్దతు ఇస్తామని ప్రకటించారు. బంగ్లాదేశ్ రాజ్యాంగ విరుద్ధంగా అక్కడ హింస (violence) జరుగుతోందని, మహమ్మద్ యూనస్ నేతృత్వంలోని ప్రభుత్వం మైనారిటీలందరినీ రక్షించాలని ఆయన కోరారు. బంగ్లాదేశ్లో స్థిరత్వం ఉండటం భారతదేశానికి, ముఖ్యంగా ఈశాన్య రాష్ట్రాల భద్రతకు అత్యంత కీలకమని, అక్కడ ఐఎస్ఐ (ISI), చైనా వంటి శక్తులు చురుగ్గా ఉన్నాయని ఒవైసీ హెచ్చరించారు.
అదే సమయంలో, భారతదేశంలో పెరుగుతున్న మూక దాడుల (Lynchings) పట్ల ఒవైసీ ఆందోళన వ్యక్తం చేశారు. డిసెంబర్ 24న ఒడిశాలోని సంబల్పూర్లో పశ్చిమ బెంగాల్కు చెందిన కార్మికుడిని కొట్టి చంపడం, ఉత్తరాఖండ్లో ఎంబా (MBA) చదువుతున్న గిరిజన విద్యార్థి ఏంజెల్ చక్మా పై దాడి వంటి ఘటనలను ఆయన ప్రస్తావించారు. చట్టబద్ధమైన పాలన దెబ్బతిని, మెజారిటీ రాజకీయాలు పెచ్చరిల్లినప్పుడు ఇలాంటి అమానవీయ ఘటనలు జరుగుతాయని ఆయన విమర్శించారు. పొరుగు దేశాల్లో మైనారిటీల గురించి మాట్లాడుతున్న మనం, మన దేశంలో జరుగుతున్న ఇలాంటి దాడులను కూడా ఖండించి, అరికట్టాల్సిన బాధ్యత ఉందని ఒవైసీ స్పష్టం చేశారు.
