ఎంపీ ప్రజ్వల్ రేవణ్ణకు సుప్రీంకోర్టులో ఎదురుదెబ్బ.. పిటిషన్ తిరస్కరణ
ఓ మహిళను బలత్కారం చేసిన కేసులో దోషిగా నిర్ధారణ అయిన కర్ణాటక ఎంపీ ప్రజ్వల్ రేవణ్ణకు సుప్రీంకోర్టులో ఎదురుదెబ్బ తగిలింది.
దిశ, వెబ్డెస్క్: ఓ మహిళను బలత్కారం చేసిన కేసులో దోషిగా నిర్ధారణ అయిన కర్ణాటక ఎంపీ ప్రజ్వల్ రేవణ్ణకు సుప్రీంకోర్టులో ఎదురుదెబ్బ తగిలింది. తాను ఇప్పటికే దోషిగా తేలిన కేసు విచారించిన అదే న్యాయమూర్తి తనపై నమోదైన ఇతర మూడు అత్యాచార కేసులను విచారించకుండా, ఆ కేసులను వేరే ట్రయల్ కోర్టుకు (వేరే న్యాయమూర్తికి) బదిలీ చేయాలని కోరుతూ రేవణ్ణ దాఖలు చేసిన పిటిషన్ను సుప్రీంకోర్టు తిరస్కరించింది. ప్రధాన న్యాయమూర్తి (CJI) సూర్యకాంత్, జస్టిస్ జాయ్మల్య బాగ్చి నేతృత్వంలోని ధర్మాసనం ఈ కేసును విచారించింది.
"ఒక కేసులో రేవణ్ణను దోషిగా తేల్చిన న్యాయమూర్తి, పెండింగ్లో ఉన్న కేసులను విచారించేటప్పుడు ఆ నిర్ణయంతో ప్రభావితమవుతారని, తప్పుదోవ పడతారని అనుమానించడానికి ఎటువంటి కారణం లేదు" అని ధర్మాసనం వ్యాఖ్యానించింది. "పెండింగ్లో ఉన్న కేసుల నిర్ణయం ఆయా కేసుల్లో ఉన్న సాక్ష్యాలపై మాత్రమే ఆధారపడి ఉంటుంది. మునుపటి విచారణ ఆధారంగా పిటిషనర్ (రేవణ్ణ)కు వ్యతిరేకంగా ఎటువంటి అంచనాలను తీసుకోరాదు" అని కోర్టు స్పష్టం చేసింది. గతంలో ఒక ఇంట్లో పనిచేసే మహిళపై అత్యాచారం కేసులో రేవణ్ణను దోషిగా తేల్చి, అతనికి యావజ్జీవ శిక్ష విధించిన అదే ట్రయల్ కోర్టులో మిగిలిన మూడు కేసుల విచారణ కొనసాగనుంది.
