కరూర్ విషాదం మర్చిపోకముందే.. దళపతి విజయ్ ర్యాలీలో మరోసారి గందరగోళం!

దిశ, వెబ్‌డెస్క్: తమిళ వెట్రి కళగం (TVK) అధినేత, సినీ నటుడు విజయ్ రాజకీయ ప్రస్థానంలో భద్రతా లోపాలు, క్రౌడ్ మేనేజ్‌మెంట్ సమస్యలు తలనొప్పిగా మారుతున్నాయి. తాజాగా తిరుచిరాపల్లి ఈస్ట్ అసెంబ్లీ స్థానానికి నామినేషన్ దాఖలు చేసేందుకు విజయ్ భారీ ర్యాలీతో తరలివచ్చారు. ఈ క్రమంలో జరిగిన తోపులాట, ఉద్రిక్త పరిస్థితులు తీవ్ర కలకలం రేపాయి. వివరాల్లోకి వెళితే.. విజయ్ నామినేషన్ వేసేందుకు వస్తున్నారన్న సమాచారంతో వేలాది మంది అభిమానులు ఒక్కసారిగా తిరుచిరాపల్లి వీధుల్లోకి చేరారు. ఆయన కాన్వాయ్ కదులుతుండగా, అభిమానులు వాహనాలను చుట్టుముట్టారు. జనసందోహాన్ని నియంత్రించడం పోలీసులకు కష్టతరంగా మారింది. విజయ్ కారును తాకేందుకు, ఆయనను దగ్గర నుంచి చూసేందుకు అభిమానులు పోటీ పడటంతో అక్కడ తీవ్ర ఉద్రిక్తత నెలకొంది.

పోలీసు అధికారికి గాయాలు..

ఈ తోపులాట మధ్య ఒక దురదృష్టకర సంఘటన చోటు చేసుకుంది. క్రౌడ్ మేనేజ్‌మెంట్‌లో భాగంగా కాన్వాయ్ ముందుకు వెళ్తున్న సమయంలో, పార్టీ కీలక నేత అర్జున్ కారు ఒక పోలీసు అధికారిని ఢీకొట్టింది. ఈ ప్రమాదంలో ఆ పోలీసు అధికారికి గాయాలయ్యాయి. వెంటనే అలర్ట్ అయిన సిబ్బంది, అక్కడే ఉన్న అంబులెన్స్‌లో సదరు పోలీసు అధికారికి ప్రాథమిక చికిత్స అందించారు. విజయ్ సభల్లో లేదా ర్యాలీల్లో ఇలాంటి గందరగోళ పరిస్థితులు కలవరపెడుతున్నాయి. గత ఏడాది సెప్టెంబర్‌లో కరూర్‌లో జరిగిన బహిరంగ సభలో భారీ తొక్కిసలాట జరిగిన విషయం తెలిసిందే. ఆ ప్రమాదంలో సుమారు 40 మందికి పైగా ప్రాణాలు కోల్పోవడం అప్పట్లో దేశవ్యాప్తంగా చర్చనీయాంశమైంది. మళ్ళీ ఇప్పుడు నామినేషన్ ర్యాలీలో కూడా క్రౌడ్ మేనేజ్‌మెంట్ వైఫల్యం చెందడంపై విమర్శలు వస్తున్నాయి. భారీ ప్రజాదరణ ఉన్న నేతలు బహిరంగంగా తిరుగుతున్నప్పుడు పార్టీ యంత్రాంగం, పోలీసులు మరింత పకడ్బందీగా వ్యవహరించకపోతే, మరిన్ని అవాంఛనీయ సంఘటనలు జరిగే ప్రమాదం ఉందని విశ్లేషకులు హెచ్చరిస్తున్నారు.