నోయిడా హింసాకాండకు ‘పాక్’తో లింక్.. కుట్ర కోణంపై దర్యాప్తు ముమ్మరం

దిశ, వెబ్‌డెస్క్: హర్యానా (Haryana) తరహాలో తమకు కూడా కనీస వేతనాలు పెంచాలని డిమాండ్ చేస్తూ నోయిడా (Noida)లోని వివిధ పారిశ్రామిక ప్రాంతాల్లో కార్మికులు చేపట్టిన నిరసనలు తీవ్ర హింసకు దారితీశాయి. నిన్న ఉదయం ప్రారంభమైన ఈ ఆందోళనలు సెక్టర్ 62, 63, ఫేజ్-2 ప్రాంతాల్లో విధ్వంసానికి దారితీశాయి. అయితే, హర్యానా ప్రభుత్వం ఇటీవల కార్మికుల కనీస వేతనాన్ని దాదాపు 35 శాతం పెంచి రూ.19వేలకు చేర్చింది. ఉత్తరప్రదేశ్‌లో కూడా ఇదే స్థాయి వేతనాలు కావాలని సుమారు 40,000 నుంచి 45,000 మంది కార్మికులు 80కి పైగా చోట్ల ఆందోళనకు దిగారు. ఈ క్రమంలో కొన్ని చోట్ల నిరసనకారులు వాహనాలకు నిప్పు పెట్టారు, కంపెనీల అద్దాలు ధ్వంసం చేశారు. పరిస్థితిని అదుపు చేయడానికి పోలీసులు లాఠీఛార్జ్ మరియు భాష్పవాయువును ప్రయోగించారు.

కుట్ర కోణంపై విచారణ..

ఈ హింస వెనుక పక్కా ప్రణాళిక ఉందని ఉత్తరప్రదేశ్ ప్రభుత్వం అనుమానిస్తోంది. ఇప్పటివరకు ఈ ఘటనలో 350 మందిని పోలీసులు అరెస్ట్ చేశారు, 100 మందికి పైగా అదుపులో ఉన్నారు. సోషల్ మీడియా (Social Media)లో తప్పుడు సమాచారం వ్యాప్తి చేయడానికి గత 24 గంటల్లోనే 50కి పైగా బాట్ (Bot) అకౌంట్లు సృష్టించబడ్డాయని పోలీసులు గుర్తించారు. వీటి వెనుక ఉన్న నెట్‌వర్క్‌ను ఛేదించడానికి యూపీ ఎస్టీఎఫ్ (STF) రంగంలోకి దిగింది. ఇటీవల నోయిడాలో పట్టుబడ్డ ఉగ్రవాదుల కోణంలో ఈ అల్లర్ల వెనుక సరిహద్దు అవతల శక్తుల ప్రమేయం ఏమైనా ఉందా అన్న అంశాన్ని కూడా దర్యాప్తు చేస్తున్నారు. అయితే, ఈ ఘటనపై సీఎం యోగి ఆదిత్యనాథ్ ఈ ఘటనపై సీరియస్ అయ్యారు. కార్మికుల సమస్యలను పరిష్కరించడానికి పారిశ్రామిక అభివృద్ధి కమిషనర్ నేతృత్వంలో ఉన్నత స్థాయి కమిటీని ఏర్పాటు చేశారు. అరాచకాన్ని సహించేది లేదని, విధ్వంసానికి పాల్పడిన వారిపై కఠిన చర్యలు తీసుకుంటామని హెచ్చరించారు.