డిజిటల్ హవాలా.. 8 వేల బ్యాంక్ అకౌంట్లు బ్లాక్

దిశ, వెబ్‌డెస్క్: జాతీయ దర్యాప్తు సంస్థ (NIA) భారీ హవాలా వ్యవస్థను ఛేదించింది. సైబర్ నేరస్తులు జమ్మూకశ్మీర్ కేంద్రంగా నడిపిస్తోన్న ఈ ఇంటర్నేషనల్ స్కామ్ సిండికేట్లతో లింకులున్న 8 వేలకు పైగా నకిలీ బ్యాంక్ అకౌంట్లను ఎన్ఐఏ బ్లాక్ చేసింది. సైబర్ ఫ్రాడ్ చేసి దోచుకున్న సొమ్మును వేర్పాటువాద, ఉగ్రవాద కార్యకలాపాలకు ఉపయోగించే ఛాన్స్ ఉన్నట్లు అధికారులు అనుమానిస్తున్నారు. మూడేళ్లపాటు వివిధ సంస్థలతో కలిసి విచారణ చేసిన తర్వాత.. ఈ భారీ హవాలా వ్యవస్థ బయటపడటం సంచలనానికి దారితీసింది.

సైబర్ నేరాల గొలుసుకట్టులో ఈ ‘మ్యూల్ అకౌంట్లు’ అత్యంత కీలకమైనవని ఇన్వెస్టిగేటర్లు వివరిస్తున్నారు. దోచుకున్న సొమ్మును క్రిప్టోకరెన్సీ వంటి గుర్తుతెలియని డిజిటల్ ఆస్తులుగా మార్చడానికి ఈ ఖాతాలు నేరగాళ్లకు అనివార్యంగా మారాయి. ఈ ముప్పును అరికట్టేందుకు జమ్మూ కాశ్మీర్ పోలీసులతో పాటు ఇతర ఎన్ఫోర్స్‌మెంట్ సంస్థలు బ్యాంకర్లతో సమన్వయం చేసుకోవాలని కేంద్ర భద్రతా సంస్థలు ఆదేశించాయి. ఈ కుట్రలో మధ్యవర్తులుగా వ్యవహరించే ‘మ్యూలర్స్’ను పట్టుకునేందుకు గాలింపు చర్యలు ముమ్మరం చేశారు.

2017లో ఎన్ఐఏ (NIA) అక్రమ నిధుల ప్రవాహంపై ఉక్కుపాదం మోపిన తర్వాత, దేశ వ్యతిరేక శక్తులు తమ పంథాను మార్చుకున్నాయని అధికారులు అనుమానిస్తున్నారు. సంప్రదాయ మార్గాలకు బదులుగా, వీరు “డిజిటల్ హవాలా” విధానాన్ని ఆశ్రయిస్తున్నట్లు తెలుస్తోంది. మ్యూల్ అకౌంట్ హోల్డర్లు, మధ్యవర్తులు సంపాదించే కమీషన్లు జాతీయ భద్రతకు విఘాతం కలిగించే కార్యకలాపాలకు మళ్లించబడుతున్నాయని నిఘా వర్గాలు భావిస్తున్నాయి.

ఈ నెట్‌వర్క్‌లో ‘మ్యూలర్’ పాత్ర చాలా వ్యూహాత్మకమైంది. వీరు నేరుగా బాధితులను మోసం చేయరు కానీ, స్కామర్లకు అవసరమైన బ్యాంకు ఖాతాలను నిరంతరం సరఫరా చేస్తుంటారు. సామాన్య ప్రజలను సులభమైన సంపాదన పేరుతో ఆకర్షించి, వారి ఆన్‌లైన్ బ్యాంకింగ్ వివరాలను సేకరిస్తారు. కేవలం "పార్కింగ్ అకౌంట్లు"గా మాత్రమే వాడుకుంటామని నమ్మించి, వారి ఖాతాలను మనీ లాండరింగ్‌కు కేందాలుగా మారుస్తారు. ఒక్కో ఆపరేటర్ చేతిలో ఒకేసారి 10 నుండి 30 వరకు ఇలాంటి ఖాతాలు ఉంటున్నాయని దర్యాప్తులో వెల్లడైంది.

తనిఖీ సంస్థల కళ్లుగప్పేందుకు నిధులను తక్కువ మొత్తాల్లో అనేక ఖాతాల ద్వారా అత్యంత వేగంగా మళ్లిస్తున్నారు. షెల్ కంపెనీల పేరుతో తెరిచిన ఖాతాల ద్వారా రోజుకు రూ. 40 లక్షల వరకు లావాదేవీలు జరుగుతున్నట్లు గుర్తించారు. కేవలం అద్దెకు ఖాతాలను ఇచ్చిన వారు సైతం ఈ నేరంలో భాగస్వాములేనని అధికారులు స్పష్టం చేస్తున్నారు. వీరు అందించే ఆర్థిక మౌలిక సదుపాయాల వల్లే అంతర్జాతీయ నేరగాళ్లు స్వేచ్ఛగా చలామణి అవుతున్నారని అధికారులు మండిపడుతున్నారు.

కేంద్ర సంస్థల తాజా అధ్యయనం ప్రకారం.. చైనా, మలేషియా, మయన్మార్, కంబోడియా వంటి దేశాల నుండి ఈ నెట్‌వర్క్ నడుస్తోంది. అక్కడి వ్యక్తులు కాశ్మీర్ లోని యువతను ప్రభావితం చేస్తూ, వీపీఎన్ (VPN)ల ద్వారా కేవైసీ అవసరం లేని ప్రైవేట్ క్రిప్టో వాలెట్లను సృష్టించేలా ప్రోత్సహిస్తున్నారు. ఉగ్రవాదులు, వేర్పాటువాదులు తమ జాడ దొరకకుండా ఉండేందుకు వీపీఎన్‌లను వాడుతున్న నేపథ్యంలో, ఇప్పటికే లోయలో వాటి వినియోగంపై పోలీసులు కఠిన ఆంక్షలు విధించారు.