సినిమాల్లో హీరోయిన్‌గా ప్రయత్నం.. ఇంతలోనే డ్రగ్స్ కేసులో అడ్డంగా బుక్: అసలు ఎవరీ సన్నీ!

దిశ, వెబ్‌డెస్క్: కేరళలో భారీ డ్రగ్స్ రాకెట్ గుట్టురట్టు అయిన సంగతి తెలిసిందే. కొచ్చిలో ఏకంగా రూ.11.82 కోట్ల విలువైన నిషేధిత గంజాయి (Marijuana) తరలిస్తూ ప్రముఖ మోడల్, సోషల్ మీడియా ఇన్‌ఫ్లుయెన్సర్ హర్ష సన్నీ నార్కోటిక్స్ కంట్రోల్ బ్యూరో (NCB) అధికారులకు రెడ్ హ్యాండెడ్‌గా దొరికిపోయారు. ఈ అంతర్జాతీయ డ్రగ్స్ నెట్వర్క్ ఉదంతం ఇప్పుడు మలయాళ చిత్ర పరిశ్రమ, మోడలింగ్ రంగాల్లో తీవ్ర కలకలం రేపుతోంది. NCB కొచ్చి యూనిట్ అధికారులకు అందిన రహస్య సమాచారం ప్రకారం.. నగరంలోని ఒక ప్రముఖ కోరియర్ సెంటర్‌పై అధికారులు మెరుపు దాడి చేశారు. ఈ తనిఖీల్లో విదేశాల నుండి పార్సిల్ రూపంలో వచ్చిన అత్యంత ఖరీదైన మేలు రకానికి చెందిన సుమారు 3.94 కిలోల హైడ్రోపోనిక్ గంజాయిని అధికారులు స్వాధీనం చేసుకున్నారు. అంతర్జాతీయ మార్కెట్లో దీని విలువ సుమారు రూ.11.82 కోట్లు ఉంటుందని అధికారులు నిర్ధారించారు. ఈ డ్రగ్స్ పార్సిల్‌ను రిసీవ్ చేసుకోవడానికి వచ్చిన మోడల్ హర్ష సన్నీని అధికారులు అక్కడికక్కడే అదుపులోకి తీసుకున్నారు.

హై ప్రొఫైల్ పార్టీలే టార్గెట్..

ఎన్‌సీబీ అధికారుల ప్రాథమిక విచారణలో దిగ్భ్రాంతికర విషయాలు వెలుగులోకి వచ్చాయి. హర్ష సన్నీ కేవలం డ్రగ్స్ వినియోగించడమే కాకుండా.. అంతర్జాతీయ డ్రగ్స్ మాఫియాతో చేతులు కలిపినట్లు తెలుస్తోంది. విదేశాల నుండి కొరియర్ల ద్వారా ఈ ఖరీదైన డ్రగ్స్‌ను తెప్పించి, కొచ్చిలోని హై ప్రొఫైల్ రేవ్ పార్టీలు, సెలబ్రిటీలు, ధనిక వర్గాల యువతకు సరఫరా చేసే పెద్ద నెట్‌వర్క్‌లో ఆమె కీలక సూత్రధారిగా వ్యవహరిస్తున్నట్లు అధికారులు అనుమానిస్తున్నారు.

ఎవరీ హర్ష సన్నీ?

కేరళకు చెందిన హర్ష సన్నీ ఫ్యాషన్ రంగంలో మంచి గుర్తింపు తెచ్చుకున్నారు. పలు లగ్జరీ బ్రాండ్స్ ప్రమోషన్స్ చేస్తూ, మోడల్‌గా వ్యవహరించిన ఆమె, ఇన్స్టాగ్రామ్లో గ్లామరస్ ఫోటోషూట్స్, విలాసవంతమైన లైఫ్ స్టైల్ రీల్స్‌తో భారీగా ఫాలోవర్లను సంపాదించుకున్నారు. మోడలింగ్ రాణిస్తూనే మలయాళ సినిమాల్లో నటిగా ఎంట్రీ ఇచ్చేందుకు ఆమె ప్రయత్నాలు చేస్తున్నట్లు సమాచారం. ఈ లోపే డ్రగ్స్ కేసులో అడ్డంగా బుక్కయ్యారు. ప్రస్తుతం కోర్టు ఆమెకు నార్కోటిక్ డ్రగ్స్ అండ్ సైకోట్రోపిక్ సబాన్సెస్ (NDPS) చట్టం కింద రిమాండ్ విధించింది. ఈ పార్సిల్ వెనుక ఉన్న ఇతర నిందితులు, మలయాళ చిత్ర పరిశ్రమకు చెందిన ఎవరికైనా ఇందులో సంబంధాలు ఉన్నాయా అనే కోణంలో అధికారులు ముమ్మరంగా విచారిస్తున్నారు.