టెన్షన్ లేకుండా నెలకు రూ.60 వేలు వస్తుంటే.. IT జాబ్ ఎవడిక్కావాలి?
సాధారణంగా ఐటీ (ఇన్ఫర్మేషన్ టెక్నాలజీ) ఉద్యోగం అంటే సమాజంలో ఒక మంచి హోదా, చేతినిండా జీతం, ఏసీ రూముల్లో పని.. ఇలా ఎంతో క్రేజ్ ఉంటుంది.
దిశ, వెబ్డెస్క్: సాధారణంగా ఐటీ (ఇన్ఫర్మేషన్ టెక్నాలజీ) ఉద్యోగం అంటే సమాజంలో ఒక మంచి హోదా, చేతినిండా జీతం, ఏసీ రూముల్లో పని.. ఇలా ఎంతో క్రేజ్ ఉంటుంది. కానీ, ఆ రంగుల ప్రపంచం వెనుక ఉండే పని ఒత్తిడి, మానసిక ఆందోళనలు భరించలేక ఓ మహిళా టెక్కీ ఊహించని నిర్ణయం తీసుకుంది. కార్పొరేట్ కొలువుకు స్వస్తి పలికి, ఏకంగా ఆటో రిక్షా డ్రైవర్గా మారి అందరినీ ఆశ్చర్యపరిచింది. ప్రస్తుతం ఆమె ఆటో నడుపుతూ నెలకు ఏకంగా 60,000 రూపాయల వరకు సంపాదిస్తూ వార్తల్లో నిలిచింది.
మానసిక ప్రశాంతత కోసమే..
సదరు మహిళ ఐటీ రంగంలో మంచి ఉద్యోగమే చేస్తున్నప్పటికీ, అక్కడి మితిమీరిన పని ఒత్తిడి ఆమె వ్యక్తిగత జీవితాన్ని దెబ్బతీసింది. వర్క్ లైఫ్ బ్యాలెన్స్ (పని, వ్యక్తిగత జీవితాల సమతుల్యత) లోపించడం, రోజురోజుకూ పెరుగుతున్న ఒత్తిడి ఆమె మానసిక ఆరోగ్యం (Mental Health) పై తీవ్ర ప్రభావం చూపించాయి. దీంతో ఎంత డబ్బు సంపాదించినా ప్రశాంతత కరువైందని భావించిన ఆమె, ధైర్యం చేసి ఆ లగ్జరీ ఉద్యోగాన్ని వదిలేయాలని నిర్ణయించుకుంది. ఉద్యోగం మానేసిన తర్వాత ఎవరి కిందో పని చేయడం ఇష్టం లేక, సొంతంగా ఆటో నడపడం ప్రారంభించింది. మొదట్లో ఈ నిర్ణయంపై భిన్నాభిప్రాయాలు వ్యక్తమైనప్పటికీ, ఆమె మాత్రం వెనకడుగు వేయలేదు. ప్రస్తుతం రోజూ ఆటో నడుపుకుంటూ.. ఎలాంటి ఒత్తిడి లేకుండా, పూర్తి స్వేచ్ఛతో జీవిస్తోంది. పైగా ఆర్థికంగా కూడా ఆమె ఏమాత్రం నష్టపోలేదు. ఆటో నడపడం ద్వారా ప్రస్తుతం నెలకు దాదాపు రూ.60,000 వరకు సంపాదిస్తూ గౌరవంగా జీవనం సాగిస్తోంది.
సోషల్ మీడియాలో వైరల్..
ఈ మహిళకు సంబంధించిన వివరాలు సోషల్ మీడియాలో పంచుకోవడంతో ఈ వార్త కాస్తా విపరీతంగా వైరల్గా మారింది. ముఖ్యంగా ఉద్యోగాల కోసం తమ సొంత ఊళ్లను వదిలి, నగరాల్లో ఒత్తిడితో కూడిన కార్పొరేట్ జీవితాన్ని గడుపుతున్న ఉద్యోగుల మనసును ఈ కథనం ఎంతగానో తాకింది. దీనిపై నెటిజన్లు రకరకాలుగా స్పందిస్తున్నారు. భారతదేశంలో శ్రమకు ఉన్న గౌరవం, సామాజిక వర్గ వివక్ష. మార్కెట్ ధోరణులపై పెద్ద ఎత్తున చర్చ జరుగుతోంది. ఏ ఉద్యోగమైనా గౌరవప్రదమైనది.. మనశ్శాంతిని ఇచ్చే పేనే అన్నింటికంటే గొప్పది" అంటూ చాలా మంది ఆమె తీసుకున్న సాహసోపేత నిర్ణయాన్ని అభినందిస్తున్నారు.
