INS Ikshak: దేశ రక్షణలో కొత్త అధ్యాయం.. ఐఎన్ఎస్ ఇక్షక్ జలప్రవేశం
దేశ రక్షణ చరిత్రలో మరో కొత్త అధ్యాయం ప్రారంభమైంది.
దిశ, డైనమిక్ బ్యూరో: (Indian Navy) దేశ రక్షణ చరిత్రలో మరో కొత్త అధ్యాయం ప్రారంభమైంది. భారత నావికాదళం గురువారం కొచ్చిలోని సదరన్ నేవల్ కమాండ్లో సర్వే వెసెల్ (SVL) తరగతికి చెందిన ఐఎన్ఎస్ ఇక్షక్ (INS Ikshak) ను జలప్రవేశం చేసింది. ఈ కార్యక్రమానికి చీఫ్ ఆఫ్ నావల్ స్టాఫ్ అడ్మిరల్ దినేశ్ కె. త్రిపాఠి ముఖ్య అతిథిగా హాజరయ్యారు. భారతదేశం సముద్ర రక్షణ వ్యవస్థను మరింత బలోపేతం చేయడంలో ఇది కీలక ముందడుగుగా నిలుస్తుందని నేవీ అధికారులు పేర్కొన్నారు. గార్డెన్ రీచ్ షిప్బిల్డర్స్ అండ్ ఇంజినీర్స్ (GRSE) సంస్థ 80 శాతం స్వదేశీ సాంకేతికతతో ఈ నౌకను నిర్మించింది. ఇది ‘ఆత్మనిర్భర్ భారత్’ లక్ష్యానికి ప్రతిబింబమని రక్షణ వర్గాలు వ్యాఖ్యానించాయి.
ఐఎన్ఎస్ ఇక్షక్ వివరాలు..
‘ఇక్షక్’ అంటే ‘గైడ్’ అని అర్థం.. సంస్కృత పదం నుంచి స్ఫూర్తి పొంది ఈ నౌకకు పేరు పెట్టారు. నావిగేషనల్ ఛానెల్లలో లోతైన నీటి, తీరప్రాంత హైడ్రోగ్రాఫిక్ సర్వేలు, సముద్ర మార్గాల భద్రతకు అవసరమైన కీలక డేటా సేకరణలో ఇది కీలక పాత్ర పోషించనుంది. భారత సముద్ర సరిహద్దులను రక్షించడమే కాకుండా, తెలియని సముద్ర మార్గాలను సరిగ్గా మ్యాప్ చేయడంలో ఐఎన్ఎస్ ఇక్షక్ కీలకంగా మారనుంది. ఈ నౌకలో అత్యాధునిక హైడ్రోగ్రాఫిక్, ఓషనోగ్రాఫిక్ పరికరాలు అమర్చబడ్డాయి. వీటిలో హై రిజల్యూషన్ మల్టీ-బీమ్ ఎకో సౌండర్, అటానమస్ అండర్వాటర్ వెహికల్ (AUV), రిమోట్లీ ఆపరేటెడ్ వెహికల్ (ROV), అలాగే నాలుగు సర్వే మోటార్ బోట్లు (SMBs) ఉన్నాయి. ఇక, ఇక్షక్ ప్రవేశం ద్వారా భారత నావికాదళం హైడ్రోగ్రాఫిక్ నౌకాదళ సామర్థ్యాలను కొత్త స్థాయికి తీసుకు వెళ్లనుంది. ఇది స్వదేశీ ప్రతిభ, సాంకేతిక నైపుణ్యం, సముద్ర రక్షణ సంకల్పానికి ప్రతీకగా నిలుస్తోందని నేవీ అధికారులు వెల్లడించారు.
