Canada: కెనడాలో భారతీయుడిని కత్తితో పొడిచి దారుణ హత్య

దిశ, వెబ్ డెస్క్: గత కొన్ని రోజులుగా కెనడాలో (Canada) భారతీయులపై, హిందూ దేవాలయాలపై దాడులు జరుగుతుండటం తెలిసిందే. తాజాగా మరో దారుణ ఘటన చోటుచేసుకుంది. ఒట్టవా సమీపంలోని రాక్‌లాండ్ ప్రాంతంలో ఓ భారతీయుడిని దుండగులు కత్తితో పొడిచి చంపేశారు. ఈ విషయాన్ని కెనడాలో ఇండియన్ ఎంబసీ ఎక్స్‌లో వెల్లడించింది.

ఒట్టావాలో భారతీయుడు కత్తి పోట్లకు గురై ప్రాణాలు కోల్పోయిన ఘటన విచారకరం అని భారత ఎంబసీ తెలిపింది. ఈ ఘటనలో అనుమానితుడిని ఇప్పటికే పోలీసులు అదుపులోకి తీసుకున్నారని చెప్పింది. మృతుడి కుటుంబసభ్యులకు అన్ని విధాల అండగా ఉంటామని పేర్కొంది. అయితే, మృతుడి వివరాలను వెల్లడించలేదు. భారత కాలమానం ప్రకారం శుక్రవారం మధ్యాహ్నం 3 గంటల ప్రాంతంలో ఈ ఘటన చోటుచేసుకున్నట్లు తెలుస్తోంది. మృతికి గల కారణాలు ఇంకా తెలియరాలేదని, దీనిపై దర్యాప్తు చేపట్టామని స్థానిక పోలీసులు వెల్లడించారు.