భారత్‌కు ఇజ్రాయెల్ పవర్‌ఫుల్ వెపన్.. సరిహద్దుల్లో మెరవనున్న ఐరన్ బీమ్!

దిశ, వెబ్ డెస్క్: భారత రక్షణ రంగ చరిత్రలో మరో కీలక ఘట్టం ఆవిష్కృతం కానున్నది. ప్రధాని నరేంద్రమోదీ ప్రస్తుత ఇజ్రాయెల్ పర్యటనలో భాగంగా, ప్రపంచంలోనే అత్యంత శక్తివంతమైన లేజర్ ఆధారిత రక్షణ వ్యవస్థ ‘ఐరన్ బీమ్’ ఒప్పందంపై ఇరు దేశాలు సంతకాలు చేసే అవకాశాలు స్పష్టంగా ఉన్నాయి. ఈ ఒప్పందం జరిగితే శత్రువుల డ్రోన్లు, క్షిపణులను కాంతి వేగంతో అడ్డుకునే ఈ సరికొత్త టెక్నాలజీ భారత్ సొంతం కాబోతోంది. ఈ ఆయుధంతోపాటు టెక్నాలజీ బదిలీ కూడా చేసేందుకు ఇజ్రాయెల్ సిద్ధంగా ఉన్నదని తెలుస్తున్నది. దీనివల్ల ఇజ్రాయెల్ అధికారిక అనుమతితో భారత్ సొంతంగా ఈ ఆయుధాన్ని ఇతర దేశాలకు కూడా ఎగుమతి చేసే అవకాశం ఉంటుంది. అయితే, ఈ ఆయుధం భారత్ చేతికి వస్తే సరిహద్దులను దాటి చిన్న డ్రోన్ కూడా లోపలికి రాలేదు.

ఏంటి ఈ ఐరన్ బీమ్?

ఇజ్రాయెల్‌కు చెందిన ‘రాఫెల్ అడ్వాన్స్‌డ్ డిఫెన్స్ సిస్టమ్స్’ అభివృద్ధి చేసిన ఈ వ్యవస్థ, సంప్రదాయ క్షిపణులకు భిన్నంగా హై-ఎనర్జీ లేజర్ కిరణాలను ఉపయోగిస్తుంది. ఇది గగనతలంలోకి దూసుకొచ్చే శత్రువుల ఆయుధాలను గుర్తించి, వాటిపై అత్యంత శక్తివంతమైన లేజర్ కిరణాన్ని ప్రసరింపజేస్తుంది. ఆ వేడికి శత్రువుల రాకెట్లు లేదా డ్రోన్లు గాలిలోనే కాలి బూడిదవుతాయి.

టెక్నికల్ స్పెసిఫికేషన్స్ (సాంకేతిక వివరాలు)

టెక్నాలజీ: 100kW క్లాస్ హై-ఎనర్జీ లేజర్

గరిష్ట పరిధి (రేంజ్): 7 కిలోమీటర్ల వరకు (ప్రస్తుత వెర్షన్)

స్పందన సమయం: లక్ష్యాన్ని గుర్తించిన 4-5 సెకన్లలో ధ్వంసం చేస్తుంది

ఖర్చు (ఒక్క రౌండ్ ఫైర్): కేవలం 2 డాలర్లు (సుమారు 165 రూపాయలు)

మందుగుండు సామర్థ్యం: అపరిమితం (విద్యుత్ ఉన్నంతవరకు పనిచేస్తుంది)

లక్ష్యాలు: డ్రోన్లు, మోర్టార్ షెల్స్, యాంటీ-ట్యాంక్ మిస్సైల్స్, రాకెట్లు

దేశానికి వ్యూహాత్మక ప్రయోజనాలు

తక్కువ ఖర్చుతో పటిష్ట రక్షణ వలయం ఏర్పడుతుంది. ప్రస్తుతం ఒక డ్రోన్‌ను కూల్చడానికి భారత్ లక్షల రూపాయల ఖరీదైన క్షిపణులను వాడుతున్నది. ఐరన్ బీమ్‌తో ఆ ఖర్చు టీ కప్పు ధర కంటే తక్కువకు పడిపోతుంది. పాకిస్థాన్ సరిహద్దుల నుండి వస్తున్న చిన్న తరహా డ్రోన్లను అడ్డుకోవడంలో ఇది అత్యంత ప్రభావవంతంగా పనిచేస్తుంది. లేజర్ కిరణాలు కంటికి కనిపించవు, శబ్దం చేయవు. దీనివల్ల శత్రువు తన దాడి ఎక్కడ విఫలమైందో కూడా గుర్తించలేడు. ఈ ఒప్పందంలో భాగంగా టెక్నాలజీ బదిలీ జరిగితే, భారత్ భవిష్యత్తులో సొంతంగా లేజర్ ఆయుధాలను తయారు చేసుకునే సామర్థ్యం పొందుతుంది. వచ్చే పదేళ్ల రక్షణ అవసరాలను దృష్టిలో ఉంచుకుని భారత్ తీసుకుంటున్న ఈ నిర్ణయం, సరిహద్దు భద్రతలో విప్లవాత్మక మార్పులకు నాంది కానుంది. ఐరన్ బీమ్ రాకతో భారత గగనతలం ఇకపై అభేద్యమైన కోటగా మారనుంది.