రాష్ట్రపతి ద్రౌపది ముర్మును కలిసిన ఐఎఫ్ఎస్ (IFS) ప్రొబేషనర్లు

దిశ, వెబ్ డెస్క్: రాష్ట్రపతి భవన్ సాంస్కృతిక కేంద్రంలో గురువారం భారత అటవీ సర్వీస్ (IFS) ప్రొబేషనర్లు భారత రాష్ట్రపతి ద్రౌపది ముర్మును మర్యాదపూర్వకంగా కలుసుకున్నారు. ఈ సందర్భంగా యువ అధికారులనుద్దేశించి రాష్ట్రపతి ప్రసంగిస్తూ, అటవీ సంరక్షణలో అనుసరించాల్సిన వ్యూహాలపై పలు కీలక సూచనలు చేశారు. అడవుల పరిరక్షణ అనేది కేవలం చట్టాల అమలు తోనే సాధ్యం కాదని, అటవీ ప్రాంతాలలో వాటి పరిసరాల్లో నివసించే ప్రజల చట్టబద్ధమైన ఆకాంక్షలను దృష్టిలో ఉంచుకుని పర్యావరణ రక్షణను సమతుల్యం చేయాలని ఆమె నొక్కి చెప్పారు.

ప్రజా భాగస్వామ్యం, అనుభవాల కలయికే ఉత్తమ నిర్ణయం..

అడవుల పునరుద్ధరణ, వన్యప్రాణుల సంరక్షణ, స్థానిక ప్రజల స్థిరమైన జీవనోపాధి (Sustainable Livelihood) కార్యక్రమాలలో ప్రజల భాగస్వామ్యాన్ని (People's Participation) పెద్ద ఎత్తున ప్రోత్సహించాలని రాష్ట్రపతి అధికారులకు సలహా ఇచ్చారు. "కేవలం శాస్త్రీయ ఆధారాలను మాత్రమే కాకుండా, అటవీ ప్రాంత ప్రజల అనుభవాల ద్వారా లభించిన జ్ఞానాన్ని, వారితో జరిపే సంప్రదింపులను మిళితం చేసినప్పుడే అత్యుత్తమమైన, ఆచరణాత్మకమైన నిర్ణయాలు వెలువడతాయి" అని రాష్ట్రపతి ద్రౌపది ముర్ము స్పష్టం చేశారు. ఆధునిక సాంకేతికతతో పాటు స్థానిక తెగల సాంప్రదాయ పద్ధతులను గౌరవిస్తూ ముందుకు సాగాలని యువ ఐఎఫ్ఎస్ అధికారులకు రాష్ట్రపతి ముర్ము దిశా నిర్దేశం చేశారు.