సిరియాలో భారీ పేలుళ్లు.. ఫ్రాన్స్ అధ్యక్షుడు మెక్రాన్‌కు తప్పిన ప్రమాదం

దిశ, వెబ్ డెస్క్: సిరియా పర్యటనలో ఉన్న ఫ్రాన్స్ అధ్యక్షుడు ఇమ్మాన్యుయేల్ మెక్రాన్‌కు (Emmanuel Macron) తృటిలో ప్రమాదం తప్పింది. రాజధాని డమాస్కస్‌లో ఆయన బస చేసిన ప్రతిష్టాత్మక 'ఫోర్ సీజన్స్' (Four Seasons) హోటల్ సమీపంలో మంగళవారం (జూలై 7, 2026) ఉదయం రెండు భారీ పేలుళ్లు సంభవించాయి. ఒక వాహనంలో అమర్చిన బాంబుతో పాటు రోడ్డు పక్కన ఉన్న డస్ట్‌బిన్‌లో ఉంచిన మరో ఇంటెన్సిటీ బాంబు పేలడంతో ఈ ఘోరం జరిగింది. ఈ పేలుళ్ల ధాటికి పలు వాహనాలు తగలబడిపోగా, నలుగురు పోలీసులు సహా కనీసం 18 మంది గాయపడినట్లు ప్రాథమిక సమాచారం అందుతోంది.

అధ్యక్షుడు మెక్రాన్ సురక్షితం..

ఈ ప్రమాదం జరిగిన సమయంలో ఫ్రాన్స్ అధ్యక్షుడు మెక్రాన్ హోటల్‌లో లేరని, ఆయన కాన్వాయ్ కొద్ది నిమిషాల ముందే సిరియా దేశ అధ్యక్షుడు అహ్మద్ అల్-షరాతో సమావేశం కోసం అధ్యక్ష భవనానికి (Presidential Palace) బయలుదేరిందని ఎలిసీ ప్యాలెస్ (ఫ్రాన్స్ ప్రెసిడెంట్ ఆఫీస్) ధృవీకరించింది. మెక్రాన్ పూర్తిగా సురక్షితంగా ఉన్నారని, ముందస్తు ప్రణాళిక ప్రకారమే ఆయన పర్యటనలు, ద్వైపాక్షిక చర్చలు కొనసాగుతాయని స్పష్టం చేసింది. సిరియాలో బషర్ అల్-అసద్ పాలన ముగిసిన తర్వాత ఒక పాశ్చాత్య దేశాధినేత డమాస్కస్ రావడం ఇదే తొలిసారి కావడం గమనార్హం. ఈ దాడులకు బాధ్యత వహిస్తూ ఇప్పటివరకు ఏ ఉగ్రవాద సంస్థ ప్రకటన విడుదల చేయలేదు.