ప్రతిపక్షంలోనే కూర్చుంటాం.. అదే మాకు గౌరవం: స్టాలిన్ కీలక నిర్ణయం

దిశ, వెబ్‌డెస్క్: తమిళనాడు అసెంబ్లీ ఎన్నికల ఫలితాల అనంతరం రాష్ట్రంలో మారుతున్న రాజకీయ పరిణామాలపై డీఎంకే (DMK) అధ్యక్షుడు ఎంకే స్టాలిన్ కీలక వ్యాఖ్యలు చేశారు. గురువారం జరిగిన పార్టీ అంతర్గత సమావేశంలో ఆయన మాట్లాడుతూ, ప్రస్తుత పరిస్థితుల్లో ప్రజలు తమకు అప్పగించిన బాధ్యతను గౌరవిస్తూ 'బాధ్యతాయుతమైన ప్రతిపక్షంగా' పనిచేయడమే తమ ప్రాధాన్యత అని స్పష్టం చేశారు. ఎన్నికల ఫలితాల్లో ఏ పార్టీకి స్పష్టమైన మెజారిటీ రాని నేపథ్యంలో, ప్రభుత్వ ఏర్పాటు కోసం జరుగుతున్న బేరసారాలకు దూరంగా ఉండాలని స్టాలిన్ నిర్ణయించుకున్నారు. "ప్రజలు మాకు ప్రతిపక్ష హోదాను ఇచ్చారు. దాన్ని మేము నిబద్ధతతో స్వీకరిస్తాం. అధికార దాహంతో అడ్డదారులు తొక్కడం డీఎంకే సంప్రదాయం కాదు" అని ఆయన పేర్కొన్నారు.

సభ్యులకు కఠిన ఆదేశాలు..

రాష్ట్రంలో ప్రభుత్వం ఏర్పాటు చేయడానికి ఇతర పార్టీల నుంచి లేదా కూటముల నుంచి ఎలాంటి ప్రతిపాదనలు వచ్చినా, పార్టీ తీసుకునే తుది నిర్ణయానికి ఎమ్మెల్యేలు, కార్యకర్తలు అందరూ కట్టుబడి ఉండాలని స్టాలిన్ ఆదేశించారు. పార్టీ క్రమశిక్షణను ఉల్లంఘించి ఇతర పార్టీలకు మద్దతు తెలిపే ప్రయత్నాలు చేయకూడదని హెచ్చరించారు. ప్రస్తుత అనిశ్చిత పరిస్థితుల్లో పార్టీ ఐక్యత చాలా ముఖ్యమని ఆయన గుర్తు చేశారు. తమిళనాడు అభివృద్ధిని కాంక్షించే పక్షాలు ప్రజాస్వామ్యబద్ధంగా ప్రభుత్వాన్ని ఏర్పాటు చేయాలని, రాజ్యాంగ సంక్షోభానికి తావు ఇవ్వకూడదని ఆయన అభిప్రాయపడ్డారు. డీఎంకే ఎప్పుడూ ప్రజల పక్షానే ఉంటుందని, అసెంబ్లీలో ప్రజా సమస్యలపై గళం విప్పుతుందని భరోసా ఇచ్చారు. ఈ సమావేశంలో డీఎంకే అగ్రనేతలు, నూతనంగా ఎన్నికైన ఎమ్మెల్యేలు పాల్గొన్నారు. స్టాలిన్ తీసుకున్న ఈ నిర్ణయం ద్వారా డీఎంకే తన రాజకీయ పరిపక్వతను చాటుకుందని రాజకీయ విశ్లేషకులు భావిస్తున్నారు.